काठमाडौँ । अफगानिस्तानले टी–२० विश्वकप २०२४ को सेमिफाइनलमा स्थान बनाएको छ । भर्खरै सम्पन्न खेलमा बंगलादेशलाई डिएलएसमा ८ रनले हराउँदै सेमिफाइनलको टिकट काटेको हो ।
योसँगै अष्ट्रेलियाको विश्वकप यात्रा सुपर ८ बाटै सकिएको छ । अफगानिस्तानले सेमिफाइनलमा दक्षिण अफ्रिकाको सामना गर्नेछ । अफगानिस्तान पहिलोपटक टी–२० विश्वकपको सेमिफाइनलमा प्रवेश गरेको हो ।
डिएलएसमा पाएको ११४ रनको लक्ष्य पछ्याएको बंगलादेश १०५ रनमा अलआउट भयो ।
उसका लागि लिटन दासले ५४ रन बनाउँदा तोहिड हृदोयले १४, सौम्य सरकारले १० रन बनाउँदा अन्य ब्याट्सम्यानले दोहोरो अंकमा रन बनाउन सकेनन् ।
बलिङतर्फ अफगानिस्तानका नवीन उल हक र रासिद खानले ४–४ विकेट लिए भने फजहल फारुकी र गुलबदिन नइबले १–१ विकेट लिए ।
त्यसअघि टस जितेर पहिले ब्याटिङ गरेको अफगानिस्तानले २० ओभरमा ५ विकेट गुमाएर ११५ रन जोड्यो । उसका लागि रहमानुल्लाह गुरबाजले ४३, रासिद खानले अविजित १९, इब्राहिम जाद्रानले १८ रन जोडे ।
बंगलादेशका लागि बलिङमा रिसाद हुसेनले ३ तथा तास्किन अहमद र मुस्ताफिजुर रहमानले १–१ विकेट लिए ।