सरकारले विभिन्न देशमा रिक्त राजदूत पदमा ८ जनालाई सिफारिस गरेको छ ।
मन्त्रिपरिषद्को आज बसेको बैठकले आठ जनालाई राजदूतमा सिफारिस गरेको हो । भारतका लागि पूर्वमुख्यसचिव लोकदर्शन रेग्मी सिफारिस भएका छन् ।
त्यस्तै अमेरिकाका लागि पूर्वसचिव चन्द्र घिमिरे सिफारिस भएका छन् । दक्षिण कोरियाका लागि मानवअधिकारवादी सुशील प्याकुरेल सिफारिस भएका छन् । उनी राष्ट्रपति विद्यादेवी भण्डारीका पालामा सल्लाहकार थिए ।
यसैगरी डेनमार्कका लागि सुम्निमा तुलाधर, मलेसियाका लागि नेत्रप्रसाद तिमिल्सिना, बेलायतका लागि बिजन पन्त, साउदी अरेबियाका लागि अबुसुफ्यान खान मुसलमान र स्पेनका लागि पुष्पराज राजकर्णिकार सिफारिस भएका छन् ।
एमाले, माओवादी र जसपाबाट राजदूतको नाम सिफारिस गरिएको हो । रास्वपाको कोटाको पछि सिफारिस हुने बताइएको छ ।
भारतको राजदूतमा सिफारिस रेग्मी बेलायतका लागि यसअघि राजदूत भएका थिए । केपी ओलीको सरकार परिवर्तन भएपछि फिर्ता हुने सूचीमा उनी परेका थिए । अमेरिकाका लागि सिफारिस भएका पूर्वसचिव घिमिरे विगतमा कोलकातास्थित महावाणिज्यदूत पनि बनेका थिए । तुलाधार महिला तथा बालअधिकारको क्षेत्रमा लामोसमयदेखि काम गरेकी व्यक्ति हुन् । यसैगरी तिमिल्सिना गैरसरकारी संस्था महासंघका पूर्व अध्यक्ष हुन् ।
बेलायतका लागि सिफारिस भएका पन्त विकास मामिलाका जानकार हुन् । राजकर्णिकार राष्ट्रिय योजनाका पूर्वसदस्य हुन् । मुसलमान जसपाका बाँकेका नेता हुन् ।
मन्त्रिपरिषद्बाट सिफारिस भएकाहरूको अब संसदीय सुनुवाई हुने छ । संसदीय सुनुवाइ पूरा भएपछि सम्बन्धित देशबाट एग्रिमो आएपछि राष्ट्रतिले नियुक्त गर्ने छन् ।
