एजेन्सी । बलिउड निर्देशक, निर्माता तथा अभिनेता फरहान अख्तरले रणवीर सिंह र कियारा आडवाणी स्टारर फिल्म ‘डन ३’ को सुटिङ २०२५ मा सुरु हुने पुष्टि गरेका छन् ।
कट्रिना कैफ, प्रियंका चोपडा र आलिया भट्ट स्टारर फिल्म ‘जी ले जरा’ पनि रोकिएको खबर आएको थियो । यसबारे पनि कुरा गर्दै फरहानले यो फिल्म बन्ने र निर्देशन आफूले गर्ने बताए ।
जुन १८ मा फरहान निर्देशित फिल्म ‘लक्ष्य’ले २० वर्ष पूरा गरेको छ । यस अवसरमा फरहानले पिंकभिलासँग कुरा गरे । यस क्रममा उनले फिल्म ‘डन ३’ र ‘जी ले जरा’को बारेमा कुरा गरे ।
फरहानले भने– हामी अर्को वर्ष फिल्म ‘डन ३’ को सुटिङ गर्नेछौँ । म आफै पनि यसको प्रतिक्षामा छु । फिल्म ‘जी ले जरा’को घोषणा पनि गरिसकेका छौं । यसको निर्देशन पनि म गर्छु । मैले चलचित्र निर्देशन गरेको लामो समय भइसकेको छ । मलाई यी चलचित्र निर्देशन गर्न एकदमै मन लाग्छ ।’
अगस्ट २०२३ मा, फरहान अख्तरले फिल्म डन ३ मा शाहरुख खानको स्थानमा रणवीर सिंहलाई कास्ट गरेको खुलासा गरेका थिए । यो खबरले पूरै सनसनी मच्चाएको छ । योसँगै अभिनेत्री कियारा आडवाणीको नाम मुख्य लिडमा परेको छ ।
अमिताभ बच्चन सन् १९७८ को डनमा र शाहरुख खान सन् २००६ को डनमा देखिएका थिए ।
