काठमाडौँ । अमेरिका र वेस्ट ईन्डिजमा जारी टी–२० विश्वकप सहभागी नेपाली राष्ट्रिय क्रिकेट टोली आज स्वदेश फर्केका छ । टोली दुई वटा समूह बनाएर नेपाल फर्किएको हो ।
कुशल भुर्तेल, सोमपाल कामी, आसिफ शेख, करन केसी र अविनाश बोहरालगायतको समूह गएराति १ बजे आएका थिए । यस्तै, कप्तान रोहित कुमार पौडेल लगायत बाँकी रहेका खेलाडी तथा अफिसियल आज बिहान १० बजे स्वदेश आइपुगेका हुन् ।
स्पीनर सन्दीप लामिछाने भने आइपुगेका छैनन् । टीमका अन्य सदस्य अमेरिका भएर नेपाल आएका हुन् । सन्दीपसँग अमेरिकाको भिसा नभएकाले क्यानडाको रुट हुँदै नेपाल आउनुपर्ने हुँदा उनी दुई दिनपछि आइपुग्ने बताइएको छ ।
विश्वकपमा नेपालले समुहचरणका चार खेलमध्ये तीन खेलमा हार बेहोरेको थियो । श्रीलंकासँगको खेल भने वर्षाका कारण प्रभावित हुँदा दुवै टोलीले अङ्क बाँडेका थिए ।
