चितवन । गृहमन्त्री रवि लामिछानेले सुर्यदर्शन सहकारीको संस्थापक अध्यक्ष गितेन्द्रबावु (जीबी) राई मलेसियामा भएको पत्ता लागेको बताएका छन् ।
बिहिबार श्री एयरलाइन्सको परीक्षण उडानका लागि भरतपुर आएका लामिछानेले पत्रकारसँग कुराकानी गर्दै यस्तो बताएका हुन् ।
गृहमन्त्री लामिछानेले दर्जनभन्दा बढी सहकारी ठगीको आरोप लागेका जीबी राईको लोकेसन पत्ता लागेको र उनलाई नेपाल ल्याउने विषयमा पहल थालिएको जानकारी दिए । ‘उनी कहाँ छन् भन्ने कुरा जानकारी भइसक्यो । मलेसियाको गृहमन्त्रीसँग पनि मेरो कुराकानी भएको छ’, उनले भने ।
सूर्यदर्शन सहकारीको १ अर्ब रुपैयाँभन्दा बढी रकम हिनामिना अभियोग लागेका राई फरार रहेका छन् । राईविरुद्ध अन्तर्राष्ट्रिय प्रहरी संगठन ‘इन्टरपोल’बाट डिफ्युजन र रेड नोटिश जारी भईसकेको छ ।
यसपछि उनी मलेसियामा लोकेट भएका थिए। सरकारले उनलाई पक्राउ गरेर पठाइदिन मलेसियन सरकारलाई कूटनीतिक नोट समेत पठाएको थियो ।
