काठमाडौँ । संसद् सचिवालयका कर्मचारीहरूको आन्दोलनका कारण प्रतिनिधिसभाको बैठक स्थगित भएको छ ।
संसद् सचिवालयका प्राविधिक कर्मचारीहरूले प्रत्यक्ष प्रसारण ‘ब्ल्याक आउट’ गरेपछि बैठक स्थगित भएको हो ।
स्वास्थ्य तथा जनसंख्या मन्त्री प्रदीप यादवले बजेटमा उठेका प्रश्नको जवाफ दिइसकेपछि सांसदहरूले पुरक प्रश्न गर्न थालेपछि प्राविधिक कर्मचारीहरूले सभामुखलाई मात्रै देखाएर भिडियो युट्युबटमा प्रसारण गरेका थिए ।
त्यसपछि सांसदहरूले आफूहरूलाई प्रश्न सोध्न दिइएको तर प्रत्यक्ष प्रसारणमा सभामुखलाई मात्रै देखाइएको भन्दै विरोध गरेका थिए ।
नेपाली कांग्रेसका सांसद रामहरि खतिवडाले ‘ब्ल्याक आउटमा सदन नचलाऔं’ भनेर आग्रह गरेपछि सभामुखले सभाको बैठक स्थगित गरिदिएका हुन् ।
प्रतिनिधिसभाको अर्को बैठक बिहीबार बिहान ११ बजेका लागि बोलाइएको छ ।
संसद् सचिवालयका कर्मचारीहरू तलब भत्ता, आवास भत्ता तथा शैक्षिक भत्ता वृद्धिको माग राख्दै आन्दोलनरत छन् ।
