काठमाडौं । नयाँ बानेश्वरस्थित संसद भवनभित्र गोली हानी आत्महत्या गरेका प्रहरी जवान अजीत गोलेले भिडियो कल गर्दै आफूलाई गोली हानेको हुन सक्ने प्रारम्भिक आशंका गरिएको छ ।
प्रहरीको अनुसन्धानको क्रममा जवान गोलेले आफैंलाई गोली प्रहारको कारण प्रेमिकासँगको सम्बन्धमा दरार आएको बुझिएको छ ।
घटनास्थल शौचालयको भित्तामा ठड्याएको अवस्थामा गोलेको मोबाइल फेला परेको अनुसन्धानमा खटिएका एक अनुसन्धान अधिकृतले जानकारी दिए ।
बुधबार बिहान दोलखा घर भएका २२ वर्षीय गोलेले शौचालयमा गएर आफैँलाई गोली हानेका थिए । उनले संसद् भवनको दुई नम्बर गेटको बायाँतर्फ रहेको शौचालयमा आफैंले बोकेको इन्सास राइफलले गोली हानेका थिए । गोलेका आफन्तको उपस्थितिमा मुचुल्का उठाएर शव पोस्टमार्टमका लागि अस्पताल लगिएको छ ।
करिब ५ महिनाअघि गोलेले आफ्नी प्रेमिकासँग इन्गेटमेन्ट गरेका थिए । उनकी प्रेमिका दुबईमा बस्दै आएकी बताईएको छ । सम्बन्धमा दरार आएपछि उनले भिडिओ कल गरेर गोली हानेको पाईएको अधिकारीले बताए ।
‘प्रेमिकासँग विवाद हुन थालेपछि गोलेले पटक पटक ‘मर्छु’ भन्दै प्रेमिकालाई म्यासेज गरेको भेटिएको छ । बुधबार बिहान भिडिओ कल र घटना पनि एकै समयमा भएको पाइएको छ’, उनले भने ।
अजीत गोले नेपाल प्रहरीको हेडक्वाटरबाट खटाइएको स्पेशल टाक्स फोर्समा कार्यरत थिए । उनी २०७८ सालमा प्रहरीमा भर्ना भएका थिए। उनलाई बिहानको समयमा ड्युटीमा खटाइएको थियो । घटनाबारे थप अनुसन्धान भइरहेको प्रहरीले जनाएको छ ।
