काठमाडौँ । प्रधानमन्त्री केपी शर्मा ओलीले प्रतिनिधिसभा पुनर्स्थापना नहुने बताएका छन् । शनिबार काठमाडौंमा आयोजित कार्यकर्ता भेलालाई सम्बोधन गर्दै प्रधानमन्त्री ओलीले प्रतिनिधिसभा विघटनको मुद्दा सर्वोच्च अदानलमा विचाराधीन रहेको बेला संसद् कुनै पनि हालतमा पुनर्स्थापना नहुने ठोकुवा गरेका हुन् ।
प्रधानमन्त्री ओलीले कार्यकर्ता संरक्षण गर्न पुष्पकमल दाहाल र माधवकुमार नेपाल पक्षले प्रतिनिधिसभा पुनर्स्थापनाको हल्ला फैलाएको बताए । 'प्रतिनिधिसभा पुनर्स्थापना हुने कुरा कहाँबाट आयो ? कसले भन्यो पुनर्स्थापना हुन्छ भनेर ? पुनर्स्थापना हुँदैन । उहाँहरूले कार्यकर्ता झुक्याउन उहाँहरू भन्नुभएको होला,' प्रधानमन्त्रीको भनाइ थियो ।
प्रतिनिधिसभा विघटन गर्नुका पछाडि आफूलाई जानकारी नदिइ राष्ट्रपतिकहाँ गएर विशेष अधिवेशन माग गर्नु, संसदमा सरकारले लगेका प्रस्ताव निर्णयार्थ प्रस्तुत नगर्नु लगायत रहेको बताए । तीन वर्षदेखिका विधेयक संसदीय समितिमा लगेर अड्काएकाले पनि प्रतिनिधिसभा विघटन र नयाँ निर्वाचनको घोषणा गरिएको बताए ।
कतिपयबाट प्रतिनिधिसभा पुनर्स्थापना हुन्छ भनेर कुप्रचार गरिएको भन्दै आफूसँग लगभग दुई तिहाई रहेको र पनि निर्वाचन चाहियो भनेकाले पुनर्स्थापना नहुने प्रधानमन्त्री ओलीको ठोकुवा थियो । उनले धारा ७६ को उपधारा ७ अनुसार प्रतिनिधिसभा विघटनको सिफारिस गरेको बताए ।
'प्रतिनिधिसभा विघटन गरेर नयाँ जानादेशका लागि जाने सिफारिस लोकतन्त्र, संविधान, स्थिरता र स्थायित्व खतरामा परेका ले हो,' ओलीले भने । प्रधानमन्त्री ओलीले संसद पुनर्स्थापना भएपछिको गठबन्धनबारे विभिन्न सञ्चारमाध्यमले अनावश्यक अल्ला फैलाइएको भन्दै रोष प्रकट गरे ।
प्रधानमन्त्री ओलीकाे सम्बाेधनका मुख्य बुँदाहरू
दुनियाँ आश्चर्यचकित हुने गरी नेपालको आर्थिक वृद्धि भएको छ । विश्वका दश उत्कृष्ट प्रगति गर्ने मुलुकमा नेपाल छ ।
नेपालको प्रधानमन्त्रीको बाहिर चर्चा पनि हुँदैनथ्यो । अहिले भारतका हरेक मान्छेलाई सोध्यो भने नेपालका प्रधानमन्त्रीको नाम हरेकलाई कण्ठै छ । हाम्रा दृष्टिकोण विश्वमा सुनिन थालेको छ, सरहाना हुन थालेको छ ।
भारतका प्रधानमन्त्री मोदी आए, नेपालको समृद्ध नेपाल सुखी नेपालीको चाहना पूरा होस् भने, चीनका राष्ट्रपतिले पनि सही गन्तव्य हो भनेर गए । तर प्रचण्ड र माधव नेपाललाई यो राष्ट्रिय आकाँक्षाका बारेमा केही मतलब छैन, कहिल्यै बोल्दैनन् । ढुंगो बोल्ला उहाँहरु बोल्नुहुन्न । यसको जस कसैलाई जाला भन्ने सानो चित्त छ उनीहरुसँग ।
चीन, भारतसँग नेपालको सम्बन्ध प्रगाढ हुँदै गएको छ ।
अहिले छापाहरुमा प्रायोजित समाचार आइरहेका छन् । चुनावको विकल्प छैन, ताजा जनादेशका लागि मुलुक अघि बढी सक्यो । टुक्रिएर गएकाहरुले कमसेकम दुई वटा अंक भएकोसम्म सिट ल्याएर देखाउनुहोस् । मलाई विश्वास छ, उहाँहरु फर्कनु हुन्छ । हामीले उहाँहरुलाई ठाउँ राखेका छौं । उहाँहरु फर्कने भनेको केन्द्रीय कमिटीमा हो । तर केन्द्रीय कमिटीमा फर्किए पनि उपद्रो मच्चाउन पाइँदैन, थान्कोमा राखिन्छ । अब गुटबन्दीलाई हामीले स्थान दिने छैनौं । व्यक्ति फर्किए पनि अब गुटबन्दी फर्कने छैन ।
आश्चर्य, दलको अध्यक्ष र प्रधानमन्त्रीलाई थाहै नदिई साथीहरु हस्ताक्षर बोकेर कुदेका छन् । केन्द्रीय कमिटीको बैठक बोलाउन सही गराए, बहाना बनाए र त्यसलाई संसदको विशेष अधिवेशन बोलाउन प्रयोग गरियो । हाम्रोतिर बहुमत छ भन्ने उहाँहरुले भन्नु भएको छ । आगामी बैशाख १७ र २७ मा हेरौं न ।
उहाँहरुले प्रथम अध्यक्ष र प्रधानमन्त्रीको पक्षमा के बोल्नु भयो ? अनुशासनहीनता, अराजकता मात्र थियो । उहाँहरु प्रतिगमनतर्फ लाग्नु भएको छ । हामीले प्रतिगमन रोक्नु थियो, स्टेरिङ सोझ्याउनु थियो, सोझ्यायौं ।
उहाँहरु दुई तिहाईको सरकार ढाल्ने, पार्टीको एकता भताभुङ्ग पार्ने र हर्स ट्रेडिङको खेल शुरु गर्ने र सधैं जोड–घटाउमा लगाउने योजनामा हुनुहुन्थ्यो । देशलाई त्यता जान नदिनका निम्ति जनताको इच्छा अनुसारको, अरुबाट संचालित होइन, आफैं संचालित हुने, जनताको मनोभावना अनुसार राष्ट्रिय हितलाई केन्द्र भागमा राखेर अघि बढ्ने सरकार चाहिएको छ । सरकारले तीन वर्षदेखि संसदमा राखेका प्रस्ताव अघि बढेनन्, समितिमा छलफल समेत गरिएन । यो अस्वस्थ षडयन्त्रको चक्रबाट मुलुकलाई मुक्त गर्न प्रतिनिधिसभाको नयाँ चुनावको घोषणा भएको हो ।
अहिले साथीहरु सोध्नुहुन्छ, के प्रतिनिधिसभा पुनस्र्थापना हुन्छ ? झण्डै दुई तिहाईको नेताले म ताजा जनादेशका लागि जान्छु भन्दा अरुले रोक्न मिल्छ ? पुरानै छानो चाहियो भनेर छिमेकी कराउँछ बा । हामीलाई चुहिएको छानोले भएन, नयाँ छानो चाहिएको छ । अर्को कुनै विकल्प छैन । संविधानको ७६ मा प्रधानमन्त्रीको सिफारिसमा प्रतिनिधिसभा विघटन गरी मिति तोक्ने भन्ने उल्लेख छ । उहाँहरुको भनाई होला, कसैले भन्ला प्रतिनिधिसभा पुनस्र्थापना भएर सरकार बन्छ, तर संविधान अनुसार नयाँ सरकार बन्ने ठाउँ नै छैन । यो सरकार गठन हुँदा संविधानका धाराहरुको प्रयोग पहिल्यै भइसकेका हुन् । अन्तिम विकल्पका रुपमा संविधानको धारा ७६(१) को सरकार बनेको हो, तर त्यसले काम गर्न सकेन, देशलाई अघि बढाउन सकिएन भन्ने हो । बाँकी अवधि खेर नफाल्न पनि यो नयाँ ताजा जनादेश चाहिएको हो । त्यसकारण यो फर्कने अवस्था छैन । मुद्दा त लड्न पाइन्छ, मुद्दा लड्नु एउटा कुरा हो ।
बेलायतका प्रधानमन्त्री बोरिस जोन्सनले संसद बिघटन गरे, र मजाले बहुमत आयो । इजरायलमा पनि चुनाव हुँदैछ । यो प्रधानमन्त्रीले विघटन गर्न सक्छ । संसदीय प्रजातान्त्रिक मुलुकमा यो सामान्य, स्वाभाविक प्रक्रिया हो ।
मैले हिजो थाहा पाएँ, उनीहरुले हामी पो असली नेकपा भनेछन् । बरमझियाको असली पेडाजस्तो । कुन असली, कुन नक्कली ? अनेक नाममा असलीको दाबी बरमझियामा हुने गरेको छ ।
एक पटक चार्ली च्यापलिनको नक्कल गर्ने प्रतिस्पर्धा भएछ । चार जना छानिए, तर चार्ली आफैं भने छानिएनछन् । हाम्रो अदालत चार्ली च्यापलिन छुट्याउन नसक्ने अवस्थामा छैन । जुँगा हेरेर, कुम हल्लाएको हिसाबले, चार्ली च्यापलिन चिन्न सर्वोच्च अदालत, निर्वाचन आयोग र अन्य न्याय निरुपण गर्ने निकायलाई हम्मे पर्ला भन्ने मलाई लाग्दैन ।
सूर्य चिह्न हामीसँग हुन्छ, पार्टी हाम्रो हुन्छ । बहुमत छ भन्नु गफै त हो सम्धी भनेजस्तै हो । कुन महाधिवेशनले भन्यो उहाँहरुसँग बहुमत छ भनेर ? रेस्लिङ खेल्नु कता हो कता गाउन पहिले नै लिएर हिंड्ने गरेको देखिन्छ । उहाँहरुको पनि त्यस्तै हो, पहिल्यै माला लगाउने काम हुँदैछ । कसले भन्यो उहाँहरुसँग बहुमत छ भनेर ?
एउटा चोर घरभित्र पसेछ । राती घरभित्र भाँडा ठोक्किएछन् । म्याउँ गरेछ चोरले । बिरालो पो रहेछ भन्यो घरवालाले । अँध्यारोमा फेरि भाँडा जोडले बजेपछि टर्च बालेर हेर्दा त चोर पो । त्यसैले हामीले पनि म्याउँ गरेर उम्कन दिनु हुँदैन, यसपटक ठेगान लगाउनु पर्छ । पदका लागि मरिमेट्नेहरुका लागि देश जिम्मा लगाउन सकिन्न ।
मैले दुई जना केटाकेटी खेलेको देखेको छु । दुबैले गुडिया बोकेका थिए । एउटाले एकछिन खेल्न के दिएको थियो, मेरै हो दिन्न भनेछ । कस्तो प्रचण्डको डुप्लीकेट रहेछ ? के एकता गरिएको थियो, कार्यकारी के यसो दिएको थियो, सबै मेरै हो भन्न थाले ।
एकछिन जादुगरले त अनेक गर्छ । रुमाल, अन्डा अनेक देखाउँछ । यस्तै चटके काम गर्छन् उनीहरुले । म सबै अलमलमा परेका नेता कार्यकर्तालाई चटकेका पछि नलाग्न र फर्कन अनुरोध गर्दछु । माधवजी मसँग अध्यक्षमा हार्नु भएको थियो, अध्यक्ष बन्न कति हतारो ? उता गएर दोस्रो अध्यक्ष बन्नु भएछ । म भन्छु, विचार गर्नुहोस् फर्कनुहोस् । यदि नफर्कने हो भने भिरबाट लड्नेलाई रामराम भन्न सकिन्छ, काँध थाप्न सकिन्न ।
