काठमाडौं । हरेक वर्ष पृथ्वी जयन्ती तथा राष्ट्रिय एकता दिवसको अवसरमा काठमाडौंमा चियापान गर्दै आएको राप्रपाले यसपटक कोरोना महामारीको कारण चियापान कार्यक्रम नगर्ने तर ७७ वटै जिल्लामा विविध कार्यक्रम गरि मनाउने भएको छ । २०६५ देखि हरेक वर्ष राप्रपाले सामाजिक जीवनका विभिन्न व्यक्तिलाई निमन्त्रणा गरि चियापान गर्दै आएको थियो ।
यसपटक गोरखामा हुने कार्यक्रममा राप्रपा अध्यक्ष कमल थापा सहभागी हुने भएका छन् । थापा गोरखामा हुने र्यालीमा सहभागी भइ पृथ्वीनारायण शाहको तस्बिरमा माल्यार्पण गर्ने र गोरखाबासीलाई सम्बोधन गर्ने कार्यक्रम रहेको राप्रपा नेता मोहन श्रेष्ठले बताएका छन् । नेपालीलाई नाम र पहिचान दिने राष्ट्र निर्माता पृथ्वीनारायण शाहको सम्मान र सम्झनमा हुने कार्यक्रममा गोरखाबासी स्वस्फूर्त रुपमा सहभागी हुने आफूहरूको अपेक्षा रहेको पनि श्रेष्ठले बताएका छन् ।
सोही दिन अध्यक्ष थापाबाट राप्रपा जिल्ला कार्यालयमा हुने पार्टीको झण्डा झण्डोत्तोलन र चुनाव चिन्ह हलोको अनावरण गर्ने तथा पार्टीका अगुवा कार्यकर्ताको भेलालाई सम्बोधन गर्ने कार्यक्रम रहेको पनि श्रेष्ठले जानकारी दिएका छन् ।
