ललितपुर । नेपाल कम्युनिष्ट पार्टी (एमाले)का महासचिव शंकर पोखरेलले अस्थिरता र अराजगताको जगमा राष्ट्र बन्न नसक्ने ठोकुवा गर्नुभएको छ ।
नेकपा (एमाले) महालक्ष्मी नगर कमिटीको दोस्रो अधिवेशनमा बोल्दै महासचिव पोखरेलले देशमा कहिल्यै स्थिर सरकार नबन्नाले राष्ट्रको उन्नति र प्रगति रोकिएको दाबी गर्नुभयो ।
देशमा प्रधानमन्त्री एक बर्ष पनि नटिक्ने, एउटा मन्त्रीले ६ महिनापनि काम गर्न नपाउने अवस्था भएपछि विकास योजना ठप्प हुनु अस्वाभाभिक नहुने पोखरलको तर्क थियो ।
मतका हिसाबले सबैभन्दा ठूलो पार्टी बनेको एमालेले पनि कुल मतको स्थानीय तहमा ३३ प्रतिशत र आम निर्वाचनमा २७ प्रतिशत मत पाउनुले कुनै पार्टीले बहुमत प्राप्त गर्न नसकेको पोखरलेको भनाई थियो ।
ठूलो पार्टी बन्दा कम्तिमा ४० प्रतिशत मत प्राप्त गर्न सकेमा मात्र केही स्थिरतामा सहयोग हुने भाव पोखरेलले व्यक्त गर्नुभयो ।
छिमेकी देश भारतमा नरेन्द्र मोदी र चीनमा सि जिन पिङ ३ कार्यकाल लगातार सरकार प्रमुख बन्ने तर नेपालमा प्रजातन्त्रपछि २८ जना प्रधानमन्त्री हुनु सबैभन्दा बिडम्बना भएको पोखरले बताउनुभयो ।
उहाँले भन्नुभयो, “देशको राजधानी काठमाडौंमा जनताले भोट दिएर राम्रो मत ल्याएको पार्टीले पाँच बर्षमा जमानत जोगाउन नसक्ने स्थिति हुनुले जनता बढी जिम्मेवार हुनुपर्दछ । अमेरिकामा सबैभन्दा पुरानो दलले हालसम्म नेतृत्व गर्ने तर नेपालमा निर्वाचनपिच्छे जनताले नयाँ खोज्ने बानीले पनि अराजगतालाई स्थान दिएको छ । त्यसैले विचार र सिद्धान्त भएको पुरानै पार्टीमा नयाँ नेतृत्व खोजेर नयाँ बनाउन सकिन्छ ।”
स्वतन्त्र नाम गरेर स्वतन्त्र पार्टी खोेलेर जनता ढाट्नु अराजगताको अर्को नमूना भएको महासचिव पोखरेल दावी गर्नुभयो ।
अधिवेशनको उद्घाटन समारोहमा महासचिव पोखरेलेसहित एमाले स्थायी कमिटी सदस्य तथा ललितपुर इञ्चार्ज शेर बहादुर तामाङ, पोलिटब्यूरो सदस्य सुशिला नेपाल, केन्द्रीय सदस्यहरु हरिकृष्ण ब्यञ्जनकार र बाबुराम थापा, बागमती प्रदेश कमिटी सचिव नवराज सिलवाल, संघीय सांसद तथा वागमती प्रदेश कमिटी उपसचिव प्रेम बहादुर महर्जन, बागमती प्रदेश कमिटी सदस्यहरु सरोज डंगोल र रामहरी बजगाई, एमाले ललितपुर अध्यक्ष पुरुषोत्तम आचार्य, महालक्ष्मी नगरप्रमुख हरिगोविन्द महर्जन, महालक्ष्मी नगरस्तरिय विभिन्न पार्टी प्रतिनिधिहरुले सम्बोधन गर्नुभएको थियो ।
अधिवेशनको बन्द सत्रका लागि २०० सदस्य प्रतिनिधिको रुपमा चयन गरिएको छ । उक्त पालिका कमिटीको दोस्रो अधिवेशनबाट ७५ सदस्यीय नयाँ कमिटी निर्वाचित गर्ने कार्यक्रम रहेको छ ।
