पोखरा । गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत प्राप्त गरेका छन् । प्रदेश सभामा मुख्यमन्त्री पाण्डेले पेस गरेको विश्वासको मतसम्बन्धी प्रस्तावमा ३१ सांसदले पक्षमा मतदान गरेका हुन् ।
पाण्डेको पक्षमा नेपाली कांग्रेसका २७, राष्ट्रिय प्रजातन्त्र पार्टी (राप्रपा) २, राजीव गुरुङ उर्फ दीपक मनाङे र माओवादीको चुनाव चिह्न लिएर चुनाव जितेका नेपाल समाजवादी पार्टी (नेसपा)का सांसद फणीन्द्र देवकोटाले मतदान गरे ।
देवकोटाले माओवादीको ह्विप विपरीत फ्लोर क्रस’ गर्दै मुख्यमन्त्रीलाई विश्वासको मत दिए । यस्तै, पाण्डेको विपक्षमा २८ तथा मत दिन्न भन्नेमा शून्य मत परेको छ । मतविभाजनान ५९ सांसदले भाग लिएका थिए ।
