एजेन्सी । भारत र पाकिस्तानबीचको क्रिकेट खेललाई क्रिकेट विश्वकै सबैभन्दा ठूलो प्रतिद्वन्द्वी मानिन्छ ।
सन् २०२४ को टी–२० विश्वकपमा दुवै टोली आज आइतबार अर्थात जुन ९ मा न्युयोर्कको नासाउ काउन्टी इन्टरनेशनल स्टेडियममा नेपाली समयानुसार ८ः१५ बजे आमनेसामने हुँदैछन् ।
यी दुईबीचको खेल हुनुअघि आतंकवादी संगठन आइएसआईएसबाट धम्की आएको थियो, त्यसलाई ध्यानमा राख्दै खेलाडीको सुरक्षामा कयौं गुणा वृद्धि गरिएको छ । खेलका क्रममा खेलाडीलाई अमेरिकी राष्ट्रपतिजस्तै सुरक्षा उपलब्ध गराइनेछ ।
भारत र पाकिस्तानबीचको खराब सम्बन्धका कारण करिब १२ वर्षअघि दुवै देशका टोलीले पछिल्लो पटक द्विपक्षीय सिरिज खेलेका थिए । दुई टोलीबीचको भिडन्त आइसीसी वा एसीसी प्रतियोगितामा हुने गरेको छ । यस्तो अवस्थामा भारत र पाकिस्तानबीचको खेल सुरक्षाको दृष्टिकोणले बढी महत्वपूर्ण हुन्छ ।
यो खेलअघि सुरक्षामा धेरै ठूला प्रश्न उठेका थिए । तर, खेलअघि स्थानीय प्रशासनले खेलाडी र खेल हेर्ने दर्शकको सुरक्षामा जोड दिएको छ । नासाउ काउन्टीका प्रहरी आयुक्त प्याट्रिक राइडरले सञ्चारमाध्यमसँग कुरा गर्दै यो सुरक्षा अमेरिकी राष्ट्रपतिको स्तरमा हुने बताए ।
प्रहरी आयुक्तले भने, ‘केही वर्षअघि तत्कालीन अमेरिकी राष्ट्रपति बाराक ओबामाको स्वागतका लागि जुन सुरक्षा व्यवस्था मिलाइएको थियो, भारत–पाकिस्तान खेलको सुरक्षा व्यवस्था पनि त्यसरी नै गरिएको छ । आइएसआईएसको धम्कीपछि सुरक्षामा बढी जोड दिइएको छ ।’
