जनकपुरधाम । जनमत पार्टीका कार्यकर्ताले जनकपुरमा हरिवन नगरपालिकाका मेयर सवार सवारी तोडफोड गरेका छन् । सिके राउत नेतृत्वके सो पार्टीका कार्यकर्ताले सवारी तोडफोड गर्दा सर्लाही जिल्लाको हरिवन नगरपालिकाका मेयर घाइते भएका छन् । राष्ट्रियसभाको निर्वाचनमा मतदान गर्न मेयर गणेश प्रसाईं जनकपुर आउँदै हुनुहुन्थ्यो । गाडीमा उपमेयर रेनुका पौडेल पनि हुनुहुन्थ्यो ।
सिके राउतका कार्यकर्ताले गरेको तोडफोडमा मेयर प्रसाईंको कञ्चटमा चोट लागेको छ । उपमेयर पौडेल सकुशल हुनुहुन्छ । जनमत पार्टीका कार्यकर्ताहरुले बुधबार बिहानैदेखि जनकपुरधामका विभिन्न स्थानमा प्रदर्शन गर्दै आएको बताइएको छ । उनीहरु राष्ट्रियसभा मतदान स्थलमा प्रवेश गर्न खोज्दा प्रहरीले लाठी चार्ज गर्नुका साथै अश्रुग्यास प्रहार गरेको थियो । प्रहरी र प्रदर्शनकारीबीच पटकपटक झडप भइरहेको बताइएको छ ।
उनीहरुले ‘पहिले खाद (मल) देऊ अनि भोट खसाऊ’ भन्दै सहरका विभिन्न स्थानमा टायर बालेर प्रदर्शन गरेका थिए ।
