काठमाडौं । नेकपा एमालेका अध्यक्ष केपी शर्मा ओली र काठमाडौं महानगरपालिकाका प्रमुख बालेन्द्र शाहबीच दिनभर वाकयुद्ध नै चल्यो । काठमाडौं महानगर प्रमुख शाहले गिरीबन्धु टी–स्टेटको १० हजार करोडको काण्ड लुकाउन अर्को काण्ड गरेर जनतालाई नझुक्याउन आग्रहसहितको सामाजिक सञ्जालमा स्टाटस लेखेका थिए ।
बालेन्द्रले झापास्थित गिरीबन्धु टी–स्टेटमा बैना लिनेहरुलाई दुई वर्षभित्र गिरीबन्धुकै जग्गा दिलाउँछौं भनेर थम्थम्याएको आरोप लगाएका थिए । उनले गिरीबन्धुबारे केपी ओलीको नाम नै उल्लेख गरेर गिरीबन्धुको विषयान्तर गर्न न्यूरोड सडकको विषय उठाएको आरोप लगाएका थिए ।
बालेन्द्रले ओलीलाई गिरीबन्धुमा अनियमितता गरेको आरोप लगाउदै पीडितको बैना फिर्ता गरिदिन चेतावनी शैलीमा आग्रह गरेका थिए ।
बालेनले लगाएको आरोपका खण्डन गर्न ओलीले भ्याएका थिएनन् । तर संसद् भवनमा पत्रकारले घेरेर ओलीमाथि प्रश्न सोध्न भ्याइहाले । जवाफमा ओलीले गिरीबन्धु टी–इस्टेटबारे काठमाडौं महानगरका मेयर बालेन्द्र शाहसँग सोध्न आग्रह गरे ।
गिरीबन्धु टी–इस्टेटबारे कुरा आइरहेका छन् भन्ने पत्रकारको प्रश्नमा अध्यक्ष ओलीले भने, ‘बालेनलाई सोध्नुस् ।’
सोमबार दिनभर ओली र बालेनबीचको वाकयुद्धको चर्चा भइरहेको थियो । साँझ परेपछि भने बालेनले सामाजिक सञ्जालमा ओलीले राखेको आफ्नो एक फोटोमा कमेन्ट गर्न भ्याए । उनले लेखेका छन्– ओ हो ! गुड नाइट केपी बा । ह्याभ अ स्वीट ड्रिम ।
