एजेन्सी । भारतको अरुणाचल प्रदेश र सिक्किममा विधानसभा चुनावको मतगणना जारी छ । सिक्किममा सत्तारुढ सिक्किम क्रान्तिकारी मोर्चा (एसकेएम) ले फेरि बहुमत प्राप्त गरेको छ ।
पूर्वमुख्यमन्त्री पवनकुमार चाम्लिङको सिक्किम डेमोक्रेटिक फन्ट (एसडीएफ) राज्यबाट बढारिएको छ । पूर्वमुख्यमन्त्री चाम्लिङसमेत चुनावमा दुई क्षेत्रबाट पराजित भएका छन् । वर्तमान मुख्यमन्त्री प्रेमसिंह तामाङ (पीएस गोले) ले रेनोक र सोरेङचाकुङ दुवै क्षेत्रबाट चुनाव जितेका छन् ।
अर्कोतर्फ अरुणाचल प्रदेशमा भाजपाले फेरि सरकार बनाउने देखिएको छ । भाजपाले यहाँ १० सिट निर्विरोध जितेको छ । अरुणाचल र सिक्किम विधानसभाका लागि १९ अप्रिलमा एउटै चरणमा मतदान भएको थियो । दुवै प्रदेशमा कांग्रेसको खाता खुल्न सकेको छैन ।
२०१९ को आम चुनावपछि एसकेएमले भाजपासँग गठबन्धन गरेको थियो तर यसपटक चुनावअघि भाजपाले सिक्किममा एक्लै चुनाव लड्ने घोषणा गरेर गठबन्धन तोड्यो ।
अरुणाचल विधानसभामा ६० सिट र सिक्किममा ३२ सिट छन् । २०१९ मा भाजपाले अरुणाचलमा ४२ सिट जितेर सरकार बनायो । यता, सिक्किममा एसकेएम ३२ मध्ये १७ सिटको साथ सरकारमा सत्तामा छ ।
