काठमाडौँ । काठमाडौँ महानगरपालिका, उपत्यकाव्यापी खुला मेयर कप फुटबल खेलको विजेता भएको छ । गोदावरी नगरपालिका वडा नं. १० टाहाखेल वहुउद्देश्यीय रङ्गशालामा आज चन्द्रागिरी नगरपालिकाको टीमसँग भएको फाइनल खेलमा २—१ अन्तरले महानगरपालिका विजेता भएको हो । यससँगै महानगरपालिकाले नगद ५ लाख रुपैयाँसँगै ट्रफी प्राप्त गरेको छ । यस्तै खेलाडीहरुलाई पदक र मेडल प्रदान गरिएको छ ।
खेलमा काठमाडौँ महानगरपालिकाका प्रशिक्षक सन्तोष न्यौपानेले उत्कृष्ठ प्रशिक्षक, किपर सुदीप गिरीले उत्कृष्ट किपर र एरिक विष्टले उत्कृष्ठ खेलाडी उपाधि प्राप्त गर्नुभयो । आजको खेलको म्यान अफ द म्याच महानगरका खेलाडी अखिलेश कार्कीले प्राप्त गर्नुभयो ।
प्रशिक्षक सन्तोष न्यौपानेको प्रशिक्षण, पूर्व राष्ट्रिय खेलाडी विराज महर्जनको कप्तानी र नविन चित्रकारको टीम व्यवस्थापनमा महानगरपालिकाका खेलाडीले प्रतिस्पर्धा गरेको थियो । टीममा सुदीप गिरी (किपर), असीम गुरुङ्, सरोज तामाङ्, आदिल हामिद, अनिल खड्का, एरिक विष्ट, राज पौडेल, दिपेश श्रेष्ठ, अखिलेश कार्की र राजीव लोप्चन पहिलो १२ खेलाडीका रुपमा खेल्नुभएको टीम व्यवस्थापक चित्रकारले जानकारी दिनुभयो ।
फाइनल खेलको प्रतिस्पर्धा अवलोकन गर्न महानगरपालिकाका कार्यवाहक प्रमुख सुनिता डंगोलसहित पदाधिकारी गोदावरी पुग्नुभएको थियो । खेलमा आफ्नो टीम विजेता भएपछि महानगरपालिकाको पहिचानमा खेल विधा थपिएको प्रतिक्रिया दिनुभयो । खेलको विकासका लागि खेलाडीहरुलाई प्रोत्साह गरिने, खेलको पूर्वाधार निर्माण गरिने उहाँको भनाइ थियो ।
महानगरपालिकाले वैशाख २० गते बुढानीलकण्ठ नगरपालिकाको टीमसँग पहिलो खेल खेलेको थियो । खेलमा ४—३ अन्तरले महानगरपालिका क्वाटर फाइनल खेलमा प्रवेश गर्यो । खेलको ९० औँ मिनेटसम्म पनि कुनै टोलीबाट गोल नभएपछि पेनाल्टीबाट निर्णय गरिएको थियो । पेनाल्टीमा सरोज तामाङ्, मनिष सेढाईँ, असिम गुरुङ् र एरिक विष्टले गोल गर्नुभएको थियो ।
क्वाटर फाइनल खेल गोदावरी वी टीमसँग खेलेको थियो । यस खेलमा २–१ अन्तरले महानगरपालिकाको टीम सेमीफाइनल चरणमा प्रवेश गर्यो । यस खेलमा महानगरपालिकाका लागि दुवै गोल राज पौडेलले गर्नुभएको थियो ।
मध्यपुर थिमी नगरपालिकाको टीमसँग भएको सेमी फाइनल खेलमा १–० अन्तरले महानगरपालिकाको टीम फाइनल चरणमा प्रवेश गर्यो । ललितपुरको च्यासल फुटबल ग्राउण्डमा भएको खेलमा महानगरपालिकातर्फबाट जर्सी नम्बर ९ का मनिष सेढाईले गोल गर्नुभएको थियो ।
यस्तै चन्द्रागिरी नगरपालिकाले वागमती गाउँपालिका, नागार्जुन नगरपालिका र महालक्ष्मी नागार्जुन नगरपालिकाको टीमलाई पछि पार्दैै फाइनलमा प्रवेश गरेको थियो ।
