काठमाडौँ । नेकपा (एकीकृत समाजवादी)ले पार्टी विभाजनसम्बन्धी चलेको हल्लामा सत्यता नभएको प्रस्ट पारेको छ ।
जसपा विभाजनपछि नेकपा एस पनि विभाजनको संघारमा पुगेको चर्चा चलिरहेको बेलामा त्यसविरुद्ध चलाइएका भ्रमको पछि नलाग्न सो पार्टीले आग्रह समेत गरेको छ ।
संसद भवन नयाँ बानेश्वरमा माधव कुमार नेपालको अध्यक्षतामा आज बसेको संसदीय दलको बैठकले यस्तो आग्रह गरेको हो ।
यस्तै, प्रतिनिधि सभा र राष्ट्रिय सभाका सम्पूर्ण सदस्यहरुको सहभागिता रहेको बैठकमा समसामयिक राष्ट्रिय राजनीति, संघीय संसदको आगामी अधिवेशनमा खेल्नु पर्ने भूमिका लगायतका विषयमा छलफल भएको थियो ।
बैठकले सरकारले ल्याउने नीति, कार्यक्रम र बजेटबारे दलको तर्फबाट सरकारलाई रचनात्मक सुझावहरु दिने, संसदको आगामी अधिवेशनमा जनसरोकारका विषयहरु सशक्त रुपमा उठाउने र कानून निर्माण प्रक्रियामा सक्रिय भूमिका निभाउने निर्णय पनि गरेको छ ।
