इलाम । प्रतिनिधिसभा इलाम क्षेत्र नं. २ मा नेकपा एमालेका सुहाङ नेम्वाङ निर्वाचित भएका छन् ।
एमाले उम्मेदवार सुहाङले २७ हजार ७ सय ७२ मत पाएर विजयी भएका छन् । निकटतम प्रतिद्वन्द्वी नेपाली कांग्रेसका डम्बरबहादुर खड्काले २१ हजार ९ सय ४२ मत पाए ।
प्रतिनिधिसभा इलाम क्षेत्र नम्बर २ मा एमालेले लगातार चुनाव जित्दै आएको आफ्नो विरासत जोगाएको छ ।
यसअघि २०७९ को निर्वाचनमा यो निर्वाचन क्षेत्रबाट नेकपा एमालेकै सुवास नेम्वाङ ११४ मतान्तरले विजयी भएका थिए । यस पटक उनै सुवासका पुत्र सुहाङले ५ हजार ८ सय ३० मतान्तरले हराएका छन् ।
२०८० भदौ २७ मा पूर्व सभामुख तथा पूर्व संविधानसभा अध्यक्ष सुवासचन्द्र नेम्वाङको निधन भएपछि इलाम–२ रिक्त थियो । रिक्त क्षेत्रको उपनिर्वाचनमा एमालेले गत चैत ११ मा नेम्वाङ पुत्र सुहाङलाई उम्मेदवार बनाउने निर्णय गरेको थियो ।
इलाम क्षेत्र नम्बर २ मा पहिचान पक्षधर स्वतन्त्र उम्मेदवार डकेन्द्रसिंह थगिम तेस्रो भएका छन् । प्रदेश–१ लाई कोशी प्रदेश नामकरण गरेको विरोधमा आन्दोलित पूर्वका जनजातिहरुका साझा उम्मेदवार बनेका थेगिमले ११ हजार ४ सय ५७ मत प्राप्त गरे ।
निकै तामझामका साथ प्रचारमा सक्रिय राष्ट्रिय स्वतन्त्र पार्टीका मिलन लिम्बूले ५ हजार ५० मत पाए । २०७९ को निर्वाचनमा रास्वपाका प्रकाश सापकोटाले १ हजार ३ सय ८० मत पाएका थिए । लिम्बू पुरानो मत संख्यालाई थोरै सुधार्ने बाहेक केही गर्न सकेनन् ।
