कैलाली । बझाङ प्रदेशसभाको उपनिर्वाचनमा भाग लिएको नेकपा (एकीकृत समाजवादी)को धरौटी जफत भएको छ ।
बझाङमा भएको उपनिर्वाचनमा ३० हजार ३ सय २८ जनाले मतदान गरेका छन् । ती मध्ये २९ हजार ७०४ मत सदर भएको थियो ।
यहाँ नेकपा एकीकृत समाजवादीका उम्मेदवार दिलबहादुर सिंहले २ हजार ५१५ मत प्राप्त गरे । सदर मतको १० प्रतिशत मत पनि नल्याएपछि नेकपा एकीकृत समाजवादीका केन्द्रीय सदस्य तथा जिल्ला इन्चार्ज समेत रहेका सिंहको धरौटी जफत भएको छ ।
बझाङमा एमालेका दमन भण्डारी निर्वाचित हुँदा कांग्रेस र माओवादी केन्द्रबाहेक सबै पार्टीको धरौटी जफत भएको छ । यहाँ ११ दलका ११ जना चुनावी प्रतिस्पर्धामा होमिएका थिए ।
