एजेन्सी । आईपीएलको जारी सिजनमा फेरि बलरहरू महँगो सावित भएका छन् । यस पटक दिल्ली क्यापिटल्सले मुम्बई इन्डियन्सका बलरलाई ‘धुलो चटाउँदै’ २५७ रनको विशाल स्कोर बनायो ।
तर, यसका बाबजुद पनि दिल्लीले जितका लागि कडा मिहिनेत गर्नुपर्यो, किनभने मुम्बईका ब्याट्सम्यानले पनि दिल्लीका बलरमाथि हावी गरेका थिए ।
तर, मुम्बईको टोलीले २४७ रन मात्र बनाउन सके र दिल्ली १० रनले विजयी भयो । यो जितपछि कप्तान ऋषभ पन्तले इम्प्याक्ट प्लेयर नियमलाई लिएर ठूलो बयान दिएका छन् ।
दिल्ली क्यापिटल्सका कप्तान ऋषभ पन्त पनि इम्प्याक्ट प्लेयर नियममा प्रश्न उठाउने भारतीय क्रिकेटरहरूको सूचीमा सामेल भएका छन् । पन्तभन्दा अगाडि रोहित शर्मा, मोहम्मद सिराज र अक्षर पटेलले पनि यस नियमको विरुद्धमा खुलेर बोलेका छन् । योसँगै धेरै पूर्व महान खेलाडीले पनि यो नियमलाई क्रिकेटका लागि हानिकारक भनेका छन् ।
२५७ रन बनाएर १० रनले जित हात पारेपछि ऋषभ पन्तले भने, ‘२५० भन्दा बढी रन बनाउन पाउँदा निकै खुसी थियौं, तर प्रभावशाली खेलाडीको नियमका कारण यस्तो स्कोरलाई पनि रक्षा गर्न गाह्रो भइरहेको छ ।’ यस खेलमा धेरै पटक मुम्बईले यो लक्ष्य हासिल गर्ने देखिन्थ्यो । तर, लगातार विकेट गुमाउँदा हार्दिक पाण्ड्याको टोलीले हार बेहोर्नुपरेको थियो ।
जितपछि कप्तान ऋषभ पन्तले २७ बलमा ८४ रनको इनिङ्स खेलेर ठूलो स्कोरको जग बसाल्ने ज्याक फ्रेजर–म्याकगर्कको प्रशंसा गरेका थिए । पन्तले भने, ‘उनी पहिलो दिनदेखि नै अचम्मका छन् र तपाइँ युवा खेलाडीबाट यही चाहानुहुन्छ । उसले हरेक खेलमा राम्रो गरिरहेको छ ।’
