काठमाडौँ । इलाम २ को मतगणना आज आइतबार बिहानबाट सुरु गरिँदै छ । मतगणना स्थलमा मतपेटिका आइपुग्न समय लागेपछि आज बिहानबाट मात्र मतगणना गरिने भएको हो ।
बिहान ७ बजे सर्वदलीय र पक्षीय बैठक राखेर मात्र मतगणना सुरु गरिने इलामका प्रमुख जिल्ला अधिकारी इन्द्रदेव यादवले जानकारी दिए ।
मतगणना स्थलमा सुरक्षा तारवार र सिसि क्यामारा जडान गरि तयार अवस्थामा राखिएको छ ।
यस क्षेत्रमा शनिबार भएको प्रतिनिधिसभा सदस्यको उपनिर्वाचनमा ५९ दशमलव ७९ प्रतिशत मत खसेको थियो । कूल ६९ हजार दुई सय ८७ अर्थात् ५९ दशमलव ७९ प्रतिशत मतदान भएको छ ।
विसं २०७९ मङ्सिर ४ को प्रतिनिधिसभा निर्वाचनमा इलाम–२ बाट निर्वाचित नेपाल कम्युनिष्ट पार्टी (एमाले)का उपाध्यक्ष सुवासचन्द्र नेम्वाङको निधन भएपछि रिक्त रहेको सो निर्वाचन क्षेत्रमा उपनिर्वाचन भएको हो । उपनिर्वाचनमा १२ राजनीतिक दलका र सात स्वतन्त्रसहित १९ जना चुनावी प्रतिस्पर्धामा छन् ।
