काठमाडौं । उपप्रधान एवं गृहमन्त्री रवि लामिछानेले नेताको हात समाएर बढुवा हुने गलत अभ्यास सच्याएर बढुवालाई स्वचालित प्रणालीमा लैजाने बताउनु भएको छ ।
काठमाडौं उपत्यका ट्राफिक प्रहरी कार्यालयद्वारा आयोजित ट्राफिक सचेतना विशेष अभियानको सुरुवात गर्दे गृहमन्त्री लामिछानेले यस्तो बताउनु भएको हो ।
उहाँले सडकसँग सम्बन्धित सरकारी निकाय र निजी क्षेत्रबीच सार्थक सहकार्य आवश्यक रहेको बताउनु भयो ।उहाँले ऐन, कानुन सुधारमा समन्वयात्मक भूमिका निर्वाह गर्ने प्रतिवद्ता व्यक्त गर्दे नागरिकको सुरक्षा सरकारको पहिलो प्राथमिकता भएकाले सडक सुधारमा ध्यान दिनुपर्ने बताउनु भयो ।
उहाँले रोड टेष्ट बिना लाइसेन्स दिने विद्यमान व्यवस्थामा सुधार गर्नुपर्ने बताउनु भयो । गृहमन्त्री लामिछानेले यातायात सुधार कार्यदलको प्रतिवेदन तत्काल उपलब्ध गराउन आग्रहगर्दे त्यसलाई कार्यान्वयनमा लैजाने आश्वसन दिनुभयो ।
उहाँले ट्राफिक प्रहरीको बोली नरम, कारबाही कडा हुनु पर्ने बताउदै हाल तिराउने गरिएको जरिवाना रकममा बृद्धि गरिने बताउनु भयो ।
ट्राफिकलाई दिने गरिएको इन्सेन्टिभ (हाल बन्द) लाई निरन्तरता दिइने जनाउदै उहाँले चालकसँग १/२ सय लिएर संगठनकै वेइजत नगर्न आग्रह गर्दे सरकारले वृति-विकासमा ध्यान दिने बताउनु भयो ।
काठमाडौंको न्युरोड गेटबाट सुरु भएको र्यालीमा सहभागी भई मन्त्री लामिछानेले अभियानको सुरुवात गर्नु भएको हो।
सभ्य सडक संस्कारको माध्यमबाट दुर्घटना न्यूनीकरण तथा सडक र ट्राफिक नियम पालनामा सचेतना अभिवृद्धिका लागि अभियान सञ्चालन गरिएको ट्राफिक प्रहरी प्रमुख डीआईजी पोषराज पोखरेलले बताउनु भयो ।
