काठमाडौँ । सत्तारुढ नेकपा (एमाले) का सांसद तारा लामा तामाङले वन्यजन्तु आरक्ष पीडितका लागि तत्काल राहतको व्यवस्था गर्न सरकारसँग माग गर्नुभएको छ ।
बुधवार प्रतिनिधि सभा बैठकमा बोल्दै उहाँले कञ्चनपुरलगायतका वन्यजन्तु आरक्ष पीडितहरुको समस्या सरकारले तत्काल सम्बोधन गर्नुपर्ने बताउनुभएको हो । सांसद तामाङलेसो सम्बन्धि समस्या पहिचानका लागि गठित न्यायिक समितिलाई अधिकार सम्पन्न बनाई कार्यादेश दिन पनि सरकारलाई दवाव दिनु भयो । सांसद तामाङले सरकारले आरक्ष पीडितहरुको समस्या समाधानका लागि गम्भिर नभएको र जनप्रतिनिधिको रुपमा आफूहरुले उठाएको मागलाई सम्बोधन गर्ने प्रयास समेत नगरेको भन्दै असन्तुष्टि समेत व्यक्त गर्नुभयो ।
उहाँले भन्नुभयो, ‘यो आयोगलाई छिटोभन्दा छिटो सुविधा सम्पन्न बनाई निश्चित समय भित्र सम्पन्न गर्नेगरी सरकारले अख्तियारी देओस् । र अर्थ मन्त्रालयले बजेटको व्यवस्थापन गरोस् । म विनम्रतापूर्वक समामुखमार्फत नेपाल सरकारको ध्यानाकर्षण गराउन चाहन्छु कि आरक्ष पीडितहरुको समस्या छिटोभन्दा छिटो समाचन गर्न त्यो न्यायिक आयोगलाई छिटोभन्दा छिटो अधिकार सम्पन्न बनाई, स्रोत सम्पन्न बनाई पठाईयोस् । त्यो अहिलेसम्म कार्यक्षेत्रमा पुगेको छैन ।’
सांसद तामाङले देशहरुका आरक्ष पीडितहरुले वन्यजन्तुको मार समेत व्यहोर्नु परिरहेकोतर्फ सरकार सचेत नभएको भन्दै आपत्ति समेत जनाउनु भयो ।
