काठमाडौं । उपप्रधान एवं गृहमन्त्री रवि लामिछाने सुशासन कायम र सहज सेवा प्रवाहमा गृह मन्त्रालय प्रत्यक्ष जोडिने भएकाले पुरातन शैलीमा काम गर्ने छुट नभएको बताउनु भएको छ ।
मन्त्रालयस्तरीय विकास समस्या समाधान समितिको बैठक तथा अर्धवार्षिक समीक्षा बैठकमा गृहमन्त्री लामिछानेले भन्नुभयो ‘पद सुरक्षित हुँदा -हुँदै पनि प्रधानमन्त्रीले सत्ता साझेदार दल परिवर्तन गर्नुको मूल कारण ‘डेलिभरी’ दिनका लागि हो। सुशासन कायम र सहज सेवा प्रवाहमा गृह मन्त्रालय प्रत्यक्ष जोडिने भएकाले पुरातन शैलीमा काम गर्ने छुट हामीलाई छैन।’
उहाँले भन्नुभयो ‘म पनि विशेष कार्यदेश लिएर आएको छु। यहाँहरुसँग त परिभाषित जिम्मेवारी छँदै छ। त्यसैले, आपसी सहकार्यमा नागरिकले तत्काल महसुस हुने गरि सुधारका काम गरौं।’
गृहमन्त्री लामिछानेले गृह मन्त्रालयसँग श्रोत-साधनको अभाव रहेको उल्लेख गर्दे प्रहरीका दुबै संगठनसँग आधारभूत बस्तुकै खाँचो रहेको र सवारी साधन, हातहतियार, उपकरण र प्रविधिमा पनि लगानी गर्नुपर्ने भएकाले त्यसतर्फ प्रर्याप्त ध्यान दिइनेजानकारी दिनु भयो ।
उहाँले नयाँ आर्थिक वर्षका लागि बजेट बन्ने प्रक्रिया सुरु भएकाले प्राथमिकता निर्धारणसहित तयारी गर्नुपर्ने उल्लेख गर्दे बजेटको सिलिङ बढाउन होइन ‘रिभ्यू’ गर्नुपर्ने बताउनु भयो । उहाँले भन्नुभयो राजस्व संकलन र चुहावट नियन्त्रणमा गृह प्रशासनको महत्वपूर्ण भूमिका छ। राजस्व बढाउन सक्यौं भने गृहको बजेट क्रमश: ‘रिभ्यूु’ हुन्छ नै। देशको ढुकुटी बलियो बनाउन सबैले इमान्दार प्रयास गरौं।
बैठकपछि मन्त्री लामिछानेले गृह मन्त्रालयका सचिव दिनेश भट्टराईलाई बिदाई गर्नुभयो। सचिव भट्टराईको हिजो प्रधानमन्त्री तथा मन्त्रिपरिषदको कार्यालयमा सरुवा भएको थियो।
