काठमाडौँ । नयाँ समिकरण बनेसँगै सरकारमा सहभागी हुनका लागि माधव नेपालले फेस सेभिङ खोजेको खबर बाहिरिएको छ ।
हिजो काँग्रेसलाई हटाएर एमालेसँगको समिकरण बनाएपछि प्रधानमन्त्री प्रचण्ड सरकारमा सहभागी हुनका लागि माधव नेपाललाई अनुरोध गरिरहेका छन् ।
हिजो साँझ पनि माधव नेपालको कोटेश्वरस्थित घरमा पुगेका प्रधानमन्त्री प्रचण्ड आज पनि पुगेका थिए । आज प्रचण्डसँगै एमालेका अध्यक्ष केपी ओली पनि पुगेका थिए ।
उनीहरु दुवैले सरकारमा आउन माधव नेपाललाई भनेका थिए । यसका लागि माधव नेपालले दुई शर्त राखेका सो भेटमा सहभागी एक सुत्रले भन्यो ।
सो समाचार सुत्रका अनुसार माधव नेपालले एमालेसँगै सरकारी गठबन्धनमा सहभागी हुनका लागि नेकपा एकताको प्रस्ताव ओलीले गर्नुपर्ने बताएका थिए । यसो गर्दा कम्तीमा पनि आफू विगतमा फुटेको नेकपा नै एक हुने भएपछि आफू गठबन्धनमा सहभागी भएको तर्क पार्टी र कार्यकर्तालाई दिन पाउनुपर्ने उनको शर्त थियो ।
त्यसैगरी सरकारमा सहभागी हुनका लागि उनले आफ्नो पार्टीले रोजेका मन्त्रालय दिनुपर्ने बताएका थिए । उनले आफूले विगतका मन्त्री नपठाउने र अब पठाउँदा पनि विगतमा पाएजति नै मन्त्रालय दिनुपर्ने उनको शर्त थियो । अघिल्लो गठबन्धनमा नेकपा एसले दुई मन्त्री र एक राज्यमन्त्री पाएको थियो ।
यी दुई शर्त राखेपछि प्रधानमन्त्री प्रचण्ड र एमाले अध्यक्ष ओली हुन्छ सल्लाह गरौँला भन्दै साँझ फर्किएका थिए । उनीहरु माधव नेपालको घरमा डेढघन्टा भन्दा बढी बसेका बताइएको छ ।
