काठमाठौ । वर्तमान सत्ता गठबन्धन लगभग टुट्ने भएको छ । गठबन्धनबाट नेपाली कांग्रेस बाहिरिएर एमाले प्रवेश गर्ने भएको हो । राष्ट्रिय सभाको अध्यक्ष कांग्रेसलाई दिने सहमति चुनाव अघि भएको भए पनि अहिले सो पदमा माओवादीले दाबी गरेपछि यी दुई पार्टीबीच खटपट सुरु भएको थियो ।
यो खटपट अब मन्त्रिमण्डल नै परिवर्तनसम्म पुगेको बताइएको छ । अहिले एमाले माओवादी अध्यक्ष प्रचण्डसँग नजिकिएको छ । जसका कारण अब माओवादीको नेतृत्वको सरकारबाट कांग्रेस निस्किने भएको छ ।
आज साँझ बालुवाटारमा एमाले अध्यक्ष ओली र रास्वपा अध्यक्ष रवि लामिछाने पुगेर प्रधानमन्त्री प्रचण्डसँग सत्ताको बाँडफाँडकै बारेमा कुराकानी गरेको समाचार स्रोतले जनायो ।
समाचार स्रोतका अनुसार साँझको बैठकमा एमाले, रास्वपा र उपेन्द्र यादवको पार्टी जसपा सरकारमा जाने विषय समेत छलफल भएको छ ।
यो गृहकार्य निकै अघि बढेपछि परराष्ट्रमन्त्रीको फिनल्याण्ड भ्रमण नै स्थगित भएको पनि बुझिएको छ । आज साँझ परराष्ट्र मन्त्रालयले दुई लाइनको विज्ञप्ति निकालेर भ्रमण स्थगित भएको जनाएको थियो ।
त्यसैगरी साँझ नै कांग्रेस सभापति शेरबहादुर देउवाले पनि आफ्ना मन्त्रीहरुलाई निवासमा बोलाएर सत्ताबाट हट्नुपर्ने पनि हुनसक्ने संकेत गरेका थिए । उता एमालेले पनि यो संकेत गरेको छ ।
अध्यक्ष ओलीले सो सत्ता गठबन्धन जसरी पनि टुट्नुपर्ने बताएका छन् भने जनकपुर पुगेर उपाध्यक्ष विष्णु पौडेलले वर्तमान सत्ता गठबन्धन आफ्नै कारणले भत्किने बताएका थिए
