एजेन्सी । स्पेनिस फुटबल क्लब भिल्लारियल च्याम्पियन्स लिगको क्वाटरफाइनलमा प्रवेश गरेको छ ।
बुधबार राति इटालियन क्लब युभेन्ट्सलाई दोस्रो लेगमा उसकै मैदानमा ३-० गोलले समग्रमा ४-० को नतिजासहित पराजित गर्दै भिल्लारियलले क्वाटरफाइनलमा स्थान बनाएको हो ।
दोस्रो लेगमा भिल्लारियललाई जित दिलाउन ७८ औं मिनेटमा पेनाल्टीमार्फत जेरार्ड मोरेनोले, ८५ औं मिनेटमा पाउ टोरेसले र ९०+२ मिनेटमा अर्नाउट डान्जुमाले गोल गरे ।
यस्तै बुधबार राति नै भएको अर्को खेलमा इंग्लिस क्लब चेल्सीले फ्रेन्च फुटबल क्लब एलओसी (लिल)लाई २-१ ले हराउँदै समग्रमा ४-१ को नतिजासहित चेल्सीले अन्तिम आठमा स्थान बनाएको छ ।
लिलको मैदानमा भएको दोस्रो लेगमा खेलको ३८ औं मिनेटमा बुराक यिल्माजले पेनाल्टीमा गोल गर्दै लिललाई सुरुवाती अग्रता दिलाएका थिए ।
तर, पहिलो हाफको इन्जुरी समयमा क्रिस्टियन पुलिसिचले गोल गर्दै चेल्सीलाई बराबरीमा ल्याए । यस्तै ७१ औं मिनेटमा सिजर आज्प्लीकुएटाले गोल गर्दै चेल्सीलाई २-१ को जित दिलाए ।
