काठमाडौँ । हिउँदे अधिवेशनमा सरकारले अत्यावश्यक २२ वटा विधेयक संसदमा लैजाने तयारी गरेको छ ।
सोमबार बिहान नेकपा (माओवादी केन्द्र) को संसदीय दलको बैठकमा प्रधानमन्त्री एवं संसदीय दलका नेता पुष्पकमल दाहाल प्रचण्डले अत्यावश्यक विधेयकलाई सदनमा टेबुल गर्ने बताउनुभएको सांसद लेखनाथ दाहालले जानकारी दिए ।
बैठकमा प्रधानमन्त्री प्रचण्डले शिक्षा विधेयक, संघीय प्रहरी ऐन, संघीय निजामति विधेयक लगायत २२ वटा अत्यावश्यक विधेयक संसदमा लैजाने तयारी रहेको जानकारी दिनुभएको दाहालले बताए । उनले भने ,‘आजको बैठकमा सरकारले आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, २०८० टेबुल गर्ने जानकारी दिनुभयो । हिउँदे अधिवेशनमा २२ वटा अत्यावश्यक विधेयक संसदमा लैजाने सरकारको तयारी रहेको जानकारी दिनुभएको छ ।’
माओवादी केन्द्रको संसदीय दलको बैठक मंगलबार बस्नेगरी स्थगित भएको उनले बताए । उनले भने, ‘बैठक मंगलबार ९ बजे बस्नेगरी स्थगित भएको छ । संसदमा कसरी प्रस्तुत हुने विषयमा भोलि छलफल हुनेछ’।
