काठमाडौँ । प्रधानमन्त्री कप एकदिवसीय पुरुष क्रिकेट प्रतियोगितामा नेपाल पुलिस क्लवले त्रिभुवन आर्मी क्लवमाथि १३ रनको जित निकालेको छ ।
आईतवार रुपन्देहीको भैरहवास्थित सिद्धार्थनगर क्रिकेट मैदानमा खराब मौसमका कारण ३३ ओभरमा छोट्याइएको खेलमा १ सय ४१ रनको लक्ष्य पछ्याउने क्रममा आर्मी ३२.२ ओभरमा मा १ सय २७ रनमा अलआउट अलआउट हुँदा पुलिसले जित दर्ज गर्यो । योसँगै नेपाल पुलिसले प्रधानमन्त्री कपमा लगातार तेस्रो जित निकालेको छ । त्रिभुवन आर्मी क्लव भने प्रतियोगितामा ४ खेलमा २ हार व्यहोरिसकेको छ ।
पुलिसका बलर चम्किँदा आर्मीका शिर्ष तीन ब्याट्सम्यान खाता नखोली आउट भए । ओपनरद्वय इमराह शेख र सन्तोष कार्की तथा तेस्रो नम्बरमा ब्याटिङ गर्न आएका सन्दीप राजाली शुन्य रनमा आउट हुँदा पुलिसलाई सहज भयो । इमरानलाई पहिलो ओभरको अन्तिम बलमा सागर ढकालले बोल्ड गरे । त्यसपछि सन्दीपलाई पनि तेस्रो ओभरको चौथो बलमा सागरले नै बोल्ड गरेका थिए । सन्तोषलाई अर्को ओभरमा ललित राजवंशीको बलिङमा अर्जुन साउदले स्टम्प आउट गरे ।
आर्मीले तीन रनमा तीन विकेट गुमाएपछि नेपाली राष्ट्रिय टोलीका नियमित खेलाडी कुशल मल्ल र भीम सार्कीले खेललाई सम्हालेका थिए । भीम र कुशलले चौथो विकेटका लागि ८९ रनको साझेदारी पारी खेले । कुशल मल्ल ४८ बलमा तीन चौका र दुई छक्का प्रहार गरी ३५ रन बनाएर २२ औं ओभरमा पेभेलियन फर्किए ।
भीम पनि २६ औं ओभरमा आउट भए । उनले ७६ बलमा ६ चौका प्रहार गर्दै ५२ रनको अर्धशतकीय पारी खेले पनि टिमले जित निकाल्न सकेन । त्यसपछि बसिर अहमद र विवेक यादव एकपछि अर्को गर्दै क्रमशः शुन्य र दुई रनमा आउट हुँदा आर्मी अप्ठ्यारोमा पर्दै गयो । आर्मीका कप्तान विनोद भण्डारी पनि धेरै समय क्रिजमा टिक्न सकेनन् । उनलाई ललित राजबंशीले १९ रनमा आउट गरे ।
सोमपाल कामी पनि तीन रन बनाएर राशिद खानको शिकार भए । यस्तै, रसिद खानले नै अन्तिम ओभरमा शाहब आलमलाई आउट गरेर पुलिसको जित सुनिश्चित गरे । बलिङतर्फ पुलिसका सागर ढकाल र ललित राजवंशीले समान तीन–तीन विकेट लिए भने रसिद खानले दुई विकेट लिन सफल भए । सागरले सात ओभरमा दुई मेडनसहित १४ रन मात्र दिए । दीपेन्द्रसिंह ऐरीले एक विकेट हात पारे ।
त्यसअघि आर्मीका तिब्र गतिका बलर सोमपाल कामीको घातक बलिङमा नेपाल पुलिस क्लवले आर्मीलाई मध्यम योगफलमा रोकेको थियो । टस हारेर पहिले ब्याटिङको निम्तो पाएको पुलिस ३१ ओभर ४ बलमा अलआउट हुँदै १ सय ४० रन बनाएको थियो ।
आर्मीको जस्तै पुलिसको शुरुवात पनि खराब थियो । १७ रनमा शुरुवाती तीन विकेट गुमाएपछि पुलिस एक समय निकै समस्यामा थियो । ओपनर कुशल भुर्तेल सोमपाल कामीको पहिलो बलमै आउट भए । विकेटकिपर अर्जुन साउद २५ बलमा १० रन मात्र बनाएर आउट हुँदा त्यसपछि दिलिप नाथ पनि शुन्यमा बोल्ड भए । तीनै विकेट सोमपालले लिएका थिए ।
ओपनर सुनिल धमला र आरिफ शेखले चौथो विकेटका लागि ७१ रनको साझेदारी गर्दै पुलिसको इनिङलाई बलियो बनाएका थिए । आरिफ ३४ बलमा तीन चौका प्रहार गर्दै १८ रनमा २३ औं ओभरमा आउट भए । त्यसपछि ब्याटिङमा आएका शंकर रानाले मात्र पाँच रन बनाउन सके । ओपनर सुनिल धमलाले तीन चौका र दुई छक्काका साथ ८० बलमा ५२ रन बनाएर पेभेलियन फर्किए । कप्तान दीपेन्द्रसिंह ऐरी पनि धेरैबेर क्रिजमा टिक्न सकेनन् । उनी १३ रन जोड्दा रन आउट भए । अलराउण्डर राशिद खानले १७ बलमा १३ रन बनाएर सोमपालको शिकार बने । त्यसपछि करण केसी १० रनमा शाहब आलमको बलमा बोल्ड भए । अन्तिममा ब्याटिङ गर्न आएका ललित राजबंशी पनि पहिलो बलमा नै शाहबकै बलमा बोल्ड भए । सागर ढकाल ३ रनमा नटआउट रहे ।
आर्मीका लागि सोमपाल कामीले घातक बलिङ गर्दै ६ ओभरमा ३ मेडनसहित मात्र १२ रन दिएर ४ विकेट लिए । विवेक यादवले सात ओभर बलिङ गर्दै ३७ रन दिएर दुई विकेट लिए । शाहब आलमले पनि ६.४ ओभर बलिङ गर्दै २६ रन खर्चेर दुई विकेट लिए । तीन खेलमा जित हात पार्दै पुलिस अंक तालिकाको दोस्रो स्थानमा उक्लिएको छ । आर्मी चार खेलबाट चार अंक जोडेर छैटौं स्थानमा छ ।
कोेशीमाथि गण्डकीको सहज जित
गण्डकी प्रदेशले आईतबार प्रधानमन्त्री कप पुरुष एकदिवसीय क्रिकेट प्रतियोगितामा कोशी प्रदेशमाथि १४२ रनको रबाफिलो जित निकालेको छ ।
मुलपानी क्रिकेट मैदानमा कोसीले लज्जापूर्ण हार व्यहोर्दा गण्डकीका विपिन खत्रीले ४२ रनका साथै ६ विकेट लिँदै यादगार प्रदर्शन गरे । गण्डकीले दिएको एक सय ६७ रनको सामान्य लक्ष्य पछ्याउने क्रममा कोशी १५.२ ओभरमा २५ रनमै समेटिन पुग्यो । कोशीको जारी प्रतियोगितामा छैटौं हार हो । कोसीका कुनै पनि ब्याटरले दोहोरो अंकमा रन बनाउन सकेनन् । कप्तान अंकित सुवेदीको ८ रन नै सर्वाधिक व्यक्तिगत स्कोर रह्यो । उनले ६ बल खेल्दा दुई चौका प्रहार गरे । त्यसबाहेक कुनैपनि ब्याटरले बाउन्ड्री प्रहार गर्न सकेनन् । गण्डकीको बलिङसामु कोशी निरिह बन्यो ।
विपिन सात ओभरमा तीन मेडन राख्दै ४ रन मात्र खर्चिए । सन्दीप पराजुलीले तीन र अंकित न्यौपानले एक विकेट विपिनलाई साथ दिएपछि कोसीको इनिङ धराशायी बन्यो । त्यसअघि टस हारेर पहिले ब्याटिङको निम्तो पाएको गण्डकीको पनि शुरुवात निकै खराब रह्यो । गण्डकी ४८.२ ओभरमा एक सय ६७ रनमै अलआउट भयो । गण्डकी २१.६ ओभरमा ७३/६ को अवस्थामा थियो । तर, मुस्कान र विपिनले इनिङ समाले । मुस्कानले १२२ बलमा सात चौकासहित ६७ रन जोडे । विपिनले ४२ रन जोड्दै इनिङ उकासे ।
उनले ७१ बलमा पाँच चौका र एक छक्का प्रहार गरे । कमल परियारले १३ रन जोडे । गण्डकीका अन्य ब्याटरले दोहोरो अंकमा रन बटुल्न सकेनन् । यद्यपि, बलिङमा साथ पाउँदा गण्डकीलाई जित निकाल्ने त्यो योगफल पनि पर्याप्त भयो । कोसीको बलिङमा अभ्यास तिमिल्सिनाले ६ विकेट लिए । फिर्दोस अन्सारी, कमल खत्री र सोनु मण्डलले थप एक विकेट लिँदा गण्डकी सामान्य योगफलमा समेटियो । तर, ब्याटिङमा भने कोशीले राम्रो गर्न सकेन र छैटौं हार सामना ग¥यो । गण्डकीले भने चौथो खेलमा पहिलो जित निकाल्यो । —न्युज एजेन्सी नेपाल
