एजेन्सी । पाकिस्तानका अलराउन्डर शोएब मलिकले शनिबार जनवरी २० मा टी–२० क्रिकेटमा इतिहास रचेका छन् । उनी टी–२० मा क्रिस गेलपछि १३ हजार रन पूरा गर्ने विश्वकै दोस्रो ब्याट्सम्यान बनेका छन् ।
बंगलादेश प्रिमियर लिग (बीपीएल) २०२४ को तेस्रो खेलमा रंगपुर राइडर्सविरुद्धको खेलमा शोएब मलिकले यो उपलब्धि हासिल गरेका हुन् ।
बंगलादेश प्रिमियर लिगमा शनिबार रंगपुर राइडर्सले फर्च्युन बारिशालको सामना गरेको छ । पहिले ब्याटिङ गरेको रंगपुर राइडर्सले ९ विकेट गुमाएर १३४ रन बनाएको थियो । फर्च्युन बरिशालले ५ विकेट गुमाएर लक्ष्य पुरा गरेको हो । शोएब मलिकले १८ बलमा १७ रनको अविजित इनिङ खेले भने महमुदुल्लाहसँग २५ रनको अविजित साझेदारी गरे ।
यो खेलमा शोएब मलिकले ७ रन बनाएर इतिहास रचे । उनी टी–२० क्रिकेटमा १३ हजार रन बनाउने दोस्रो खेलाडी बनेका छन् । वेस्ट इन्डिजका ब्याट्सम्यान क्रिस गेलले टी–२० क्रिकेटमा सबैभन्दा धेरै रन बनाएका छन् । गेलको नाममा १४ हजार ५६२ रन छन् ।
एसियामा टी–२० क्रिकेटमा सर्वाधिक रन बनाउने खेलाडी भए पनि शोएब मलिकले अहिलेसम्म टी–२० शतक बनाउन सकेका छैनन् । शोएब मलिकले टेस्ट र एकदिवसीय क्रिकेटबाट सन्यास लिएका छन् । शोएब मलिकले पाकिस्तानका लागि १२४ टी–२० खेलमा ३०को औसतमा २४३५ रन बनाएका छन् । शोएब मलिक, जो २००९ मा टी२० विश्व कप विजेता टोलीको हिस्सा थिए, उनले नोभेम्बर २०, २०२१ देखि पाकिस्तानका लागि क्रिकेट खेलेका छैनन् ।
