काठमाडौं । प्रधानमन्त्री कप एकदिवसीय राष्ट्रिय प्रतियोगितामा बागमती प्रदेशले त्रिभुवन आर्मी क्लबलाई तीन विकेटले पराजित गरेको छ । बागमती यो ऐतिहासिक जित पनि हो । यसअघि प्रधानमन्त्री कपमा बागमतीले आर्मीलाई हराउन सकेको थिएन ।
जितको ९८ रनको सामान्य लक्ष्य पछ्याएको बागमतीले २२.१ ओभरमा ७ विकेट गुमाउँदै पूरा गर्यो ।
बागमतीको जितमा अशोक पौडेलले सर्वाधिक २१ रन बनाए । प्रतिश जिसि २१ रनमा नट आउट रहँदा ईशान पाण्डेले १२, रविन जोशीले १२, प्रतीक श्रेष्ठले ७, रित गौतमले ४ र आशुतोष घिरैयाले २ रन बनाए ।
बलिङतर्फ आर्मीका तिव्र गतिका बलर सोमपाल कामीले तीन विकेट लिदा जितेन्द्र मुखिया र साहब आलमले दुई/दुई विकेट लिए ।
त्यसअघि मुलपानी क्रिकेट मैदानमा टस जितेर पहिला ब्याटिङ रोजेको आर्मी २७।१ ओभरमा अल आउट हुँदै ९७ रन बनाएको थियो ।
आर्मीको लागि कप्तान विनोद भण्डारीले ४० बलमा ४ चौकासहित सर्वाधिक २८ रन बनाए । भीम सार्की ४१ बलमा ३ चौकासहित १८ रन बनाए भने बिबेक यादवले ११ रन जोडे ।
बागमतीका सूर्य तामाङले ५ विकेट लिए भने प्रतिश जिसीले र रिजन ढकालले समान दुई/दुई विकेट लिए । त्यस्तै, कृर्जन गुरुङले एक विकेट लिए ।
