काठमाडौँ । मोडल नीति शाहले फिल्म अभिनयमा डेब्यु गरेकी छन् । ‘मिस इन्टरनेशनल नेपाल २०१७’ विजेता समेत रहेकी शाहले फिल्म ‘खजुरे ब्रो’बाट अभिनयमा डेब्यु गरेकी हुन् ।
शाहले अभिनय गर्ने भनिएका चलचित्रहरू ‘हुतुतु’, ‘एक्स ९’, ‘कामिनो’ र ‘रावायण’ नबनेपछि उनी अब अर्को चलचित्रमा काम गर्ने भएकी छन् ।
दुई हप्ताअघि नै यस चलचित्रमा अनुबन्ध भएर उनी शुक्रबारबाट छायाङ्कनमा समेत जोडिइसकेकी छन् । यो फिल्मको छायांकन ३ दिनदेखि काठमाडौंमा जारी छ । निर्माणपक्षले भने माघे सङ्क्रान्तिको अवसर पारेर भोलि मात्र यसको शुभ साइत गर्दैछ । फिल्मको छायांकन नै सुरु भइसकेकाले नीतिलाई ठूलो राहत मिलेको छ ।
फिल्ममा नीतिको साथमा रेयर राई, महेश त्रिपाठी, नवीन मानन्धरको अभिनय छ । फिल्मलाई सुरज सुनुवारले निर्देशन गरिरहेका छन् । फिल्ममा नवीन मानन्धर र सुरज सुनुवारको लगानी छ । शीर्षकले नै ‘खजुरे ब्रो’ कमेडी कथावस्तुमा निर्माण हुने संकेत गर्छ ।
