काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगितामा नेपाल एपीएफ क्लबले बागमती प्रदेशलाई ८९ रनले हराएको छ । यससँगै एपीएफले जीतको खाता खोलेको छ भने बागमतीले लगातार दोस्रो हार बेहोर्यो ।
जितको लागि २ सय ४२ रनको विजयी लक्ष्य पछ्याएको बागमती ४२.५ ओभरमा अल आउट हुदै १ सय ५२ रन मात्र बनायो । बागमतीका कप्तान रित गौतमले सर्वाधिक ६६ रन बनाए । ओपनर आशुतोष घिरैयाले ४१ रन बनाउँदा बागमतीका अन्य कुनैपनि ब्याटरले राम्रो प्रदर्शन गर्न सकेनन् ।
एपीएफका कप्तान रोहित पौडेलले सर्वाधिक ४ विकेट लिए । अभिनाश बोहरा र श्याम ढकालले २/२ विकेट लिँदा पुरन विक र भुवन कार्कीले १/१ विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको एपिएफले निर्धारित ५० ओभरमा ९ विकेट गुमाएर २ सय ४१ रन बनाएको थियो । एपीएफको लागि मध्यक्रमका ब्याटर सन्दीप जोराले शानदार शतक बनाएमा थिए । उनले १०३ बलमा ५ छक्का र ६ चौका प्रहार गर्दै १०१ रन बनाए ।
एक समय ४१-५ को अवस्थामा पुगेको एपीएफलाई उनले उद्दार गरेका थिए । क्रिजमा पाँचौ नम्बरका आएका सन्दीपले लोकेश बमसँग ६१ रनको अर्धशतकीय साझेदारी गर्दै एपीएफलाई १०७ सम्म पुर्याएका थिए । त्यस्तै, उनले आठौँ विकेटका लागि अमर रौतेलासँग ६८ र नवौँ विकेटका लागि अविनाश बोहरासँग ४२ रनको साझेदारी गरेका थिए।
एपीएफको लागि कप्तान रोहित पौडेलले २ र आसिफले १५ रन जोडे । सुमित महर्जनले ६ रन बनाउदा ओपनर प्रज्वल शाहीले १० रन बनाएर आउट भएका थिए । अमर २२ रन बनाए भने अभिनाश बोहोरा १८ रन बनाउदै नटआउट रहे ।
बलिङतर्फ बागमतीका सूर्य तामाङले तीन विकेट लिए भने प्रतिश जिसी, सोनु देवकोटा र रिजन ढकालले समान एक–एक विकेट लिए ।
राउन्ड रोविनको आधारमा हुने प्रतियोगिताका शीर्ष दुई टोली फाइनल खेल्नेछन् । पिएमकप टियु, मुलपानी र भैरहवामो सिद्धार्थ रंगशालामा हुनेछन् ।
