काठमाडौं । वाणिज्य बैंकहरूले माघ महिनाको लागि निक्षेपको ब्याजदर घटाएका छन् । बैंकिङ प्रणालीमा अधिक तरलता र निक्षेपको वृद्धि भन्दा कर्जाको वृद्धि लगातार न्यून भएपछि बैंकहरुले निक्षेपको ब्याजदर घटाएका हुन् ।
बैंकहरूको औसतमा व्यक्तिगत मुद्दती निक्षेपको ब्याजदर माघ महिनाका लागि ८.१७ प्रतिशत तोकिएको छ । पुस महिनामा ८.९९ प्रतिशत थियो ।
सबैभन्दा बढी ब्याज दिनेमा एनएमबी बैंक रहेको छ । एनएमबीले सबैभन्दा धेरै ९ प्रतिशतसम्म ब्याज दिने भएको छ भने सरकारी स्वामित्वको कृषि विकास बैंकले भने सबैभन्दा कम ७.२६ प्रतिशतसम्म ब्याजदर तोकेको छ ।
नेपाल इन्भेष्टमेन्ट मेगा बैंकले ८.६० प्रतिशत ब्याजदर दिने भएको छ । नेपाल एसबिआई बैंकले ८.२५ प्रतिशत, हिमालयन र सानिमा बैंकले ८.१५ र कुमारी बैंकले व्यक्तिगत मुद्दती निक्षेपमा ८.११ प्रतिशतले ब्याजदर कायम गरेको छ ।
यस्तै, प्राइम कमर्सियल बैंक, सिद्धार्थ, ग्लोबल आईएमई र नबिल बैंकले ८.१० प्रतिशत ब्याजदर कायम गरेका छन् ।
राष्ट्रिय वाणिज्य बैंक र स्ट्यान्डर्ड चार्टर्ड बैंकले ८.०७ तोकेका छन् भने प्रभु र एनआईसी एशिया बैंकले ८.०६५ प्रतिशत ब्याजदर प्रकाशित गरेका छन् ।
