काठमाडौं । पूर्व राष्ट्रपति विद्यादेवी भण्डारीले सवारी अनुशासनको कडाईका साथ पालना गराउन आग्रह गर्नुभएको छ ।
बढ्दो सवारी दुर्घटना प्रति चिन्ता व्यक्त गर्दै पूर्व राष्ट्रपति भण्डारीले सवारी अनुशासनको कडाईका साथ पालना गर्न एवं दुर्घटनाका कारणहरू पहिचान गरी आवश्यक उपायहरू अवलम्बन गर्न चालक, यात्रु र सवारी नियामक निकायको ध्यानआकृष्ट गराउनु भएको छ ।
उहाँले सामाजिक संञ्जाल मार्फत सवारी दुर्घटनाहरूमा परी ज्यान गुमाउनेहरूप्रति हार्दिक श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गर्नुभएको छ ।
उहाँले लेख्नुभएको छ –
गए राती दाङको भालुवाङमा भएको बस दुर्घटनामा परी १२ जनाको मृत्यु भएको, आज विहान बागलुङको बुर्तिबाङमा भएको जीप दुर्घटनामा परी दुईजनाको मृत्यु भएको र आजै दिउँसो काठमाडौँ महानगरपालिकाको चन्द्रागिरी नगरपालिका अन्तर्गत सेतो पहरामा भएको कार दुर्घटनामा परी ४ जनाको मृत्यु भएको अत्यन्त दुस्खद् खबर प्राप्त भएको छ । वितेका २४ घण्टाभित्र भएका यी सडक दुर्घटनाहरूमा परी ज्यान गुमाउनेहरूप्रति हार्दिक श्रद्धाञ्जली व्यक्त गर्दछु र घाइतेहरूको शीघ्र स्वास्थ्यलाभको कामना गर्दछु । दुर्घटनामा आफ्ना प्रियजन गुमाउने शोकविह्वल परिवारजनप्रति मेरो गहिरो समवेदना !सवारी दुर्घटना न्यूनीकरण गर्नका लागि सवारी अनुशासनको कडाईका साथ पालना गर्न एवं दुर्घटनाका कारणहरू पहिचान गरी आवश्यक उपायहरू अवलम्बन गर्न म चालक, यात्रु र सवारी नियामक निकायको ध्यान आकृष्ट गराउँदछु ।
