प्रधानमन्त्री एवं नेकपा एमालका अध्यक्ष केपी शर्मा ओलीले पार्टीको नाममा माधव नेपाल पक्षले छुट्टै गुटको भेला गरे उनीहरुलाई कारवाही गर्ने चेतावनी दिनुभएको छ । आज प्रधानमन्त्री ओलीले पार्टी कार्यकर्ताका लागि चियापानको आयोजना गर्नुभएको थियो । तर ओली पक्षले आयोजना गरेको सो चियापानमा उपस्थित नहुन नेपाल पक्षले सूचना नै जारी गरेको थियो ।
जसका कारण आज बालुवाटारमा माधव नेपाल र झलनाथ खनाल तथा उनीहरु पक्षका कोही पनि नेता कार्यकर्ता उपस्थित भएका थिएनन् । प्रधानमन्त्रीको सरकारी निवास बालुवाटारमा मंगलबार पार्टीका केन्द्रीय सदस्यहरूका लागि गरिएको चियापानमा उपस्थित नभएको देखेपछि प्रधानमन्त्रीले यस्तो चेतावनी दिनुभएको हो ।
सो कार्यक्रममा बोल्दै उहाँले भन्नुभयो, पार्टीमा बसेपछि उच्छृङ्खल काम गर्ने छुट कसैलाई छैन, यदि पार्टीको नाम लिएर अलग्गै बैठक या भेला गरकोे पाइएमा कारबाही हुनेछ ।
उहाँले भोली नेपाल र खनाल पक्षले गर्न लागेको भेलाबारे बोल्दै त्यस्ता गुटगत भेला नगर्न, त्यस्ता भेलामा सरिक नहुन सचेत गराएको जानकारी पनि सो अवसरमा दिनुभएको थियो ।
उहाँले भन्नुभयो, ‘अचाक्ली भयो, पार्टीलाई पार्टीको रुपमा चल्न नदिने, जहिले पनि भाँडभैलो मच्चाउने, अब यो कुरा हुन सक्दैन । पार्टीमा हामी सबैले बिचारमा एकजुट भएर विधि पद्धतिमा रहेर काम गर्नुपर्छ । अब अनुसाशनहिन काम भयो भने पार्टीको निधान छ, कानुन छ, संविधान छ, संसद नियमावली छ, दलसम्बन्धी कानुन छ, यी सबैतिर म ध्यानाकर्षण गराउन चाहन्छु ।’
उहाँले भन्नुभयो– ‘एकथरी अनुहार आज चियापानमा देखिएनन्, यो राम्रो लक्षण हैन । उहाँहरुले त्यस्तो निर्णय गरेको होइन होला भन्ने म ठान्छु । अझै केही समय बाँकी छ । भोली गुटगत भेला राख्नुहुन्छ राख्नुहुन्न कतिको तमासा गर्नुहुन्छ एक नजर त्यता राखिनेछ ।’
