काठमाडौंः राष्ट्रपति विद्यादेवी भण्डारीले नेपालको राजनीतिक सौन्दर्य आपसी संवाद, सहकार्य र एकता रहिआएको परिवेशमा संविधानको प्रभावकारी कार्यान्वयन र लोकतन्त्रको सुदृढीकरणका लागि राजनीतिक दलहरुबीचको सहकार्यलाई निरन्तरता दिन आग्रह गर्नु भएको छ ।
राष्ट्रपति कार्यालय, महाराजगंजमा मंगलबार अपराह्न संसदमा प्रतिनिधित्व गर्ने दलका शीर्ष नेताहरु एवं पूर्व प्रधानमन्त्रीहरुबीच आयोजित भेटघाट कार्यक्रममा स्वागत मन्तव्य राख्दै राष्ट्रपति भण्डारीले नागरिकका दैनिक समस्या र जनजीविकाका विषयमा आपसी संवाद र छलफललाई निरन्तरता दिन आह्वान गर्नु भएको थियो ।
वर्तमान केपी ओली सरकारले गरेका कार्यहरुको बचाउ गर्दै राष्ट्रपति भण्डारीले कोरोनाभाइरसको महामारी नियन्त्रण र नेपालको नयाँ राजनीतिक नक्सा प्रकाशन गर्ने सन्दर्भमा दलहरुले देखिएको अभूतपूर्व एकताका लागि धन्यवाद पनि दिनु भएको थियो ।
बैठकमा प्रधानमन्त्री तथा नेकपा एमालेका अध्यक्ष केपी शर्मा ओली, नेपाली काँग्रेसका सभापति शेर बहादुर देउवा, नेकपा (माओवादी केन्द्र) का अध्यक्ष पुष्पकमल दाहाल प्रचण्ड, जनता समाजवादी पार्टीका अध्यक्षहरु महन्थ ठाकुर, उपेन्द्र यादव र राजेन्द्र महतोको सहभागिता थियो ।
तर बैठकमा एमालेका वरिष्ठ नेता झलनाथ खनाल र माधव कुमार नेपाल तथा जसपा संघीय परिषदका अध्यक्ष डा बाबुराम भट्टराई उपस्थित हुनु भएको थिएन ।
गृहमन्त्री बादल एमालेका तर्फबाट उपस्थित
राष्ट्रपति कार्यालयका प्रवक्ता रुपनारायण भट्टराईले जारी गर्नु भएको विज्ञप्तिमा तत्कालीन नेकपा (माओवादी) का नेता एवं गृहमन्त्री रामबहादुर थापालाई नेकपा (एमाले) का तर्फबाट उपस्थित भनी उल्लेख गर्नु भएको छ ।
राष्ट्रपति बंगलादेश जाने
भेटघाट कार्यक्रममा राष्ट्रपति भण्डारीले आफू बंगलादेशका राष्ट्रपिता बंगबन्धु शेख मुजिबुर रहमानको जन्म शतवार्षिकीको अवसरमा ढाकामा आयोजना हुने कार्यक्रममा सहभागी हुन बंगलादेशका राष्ट्रपतिले निमन्त्रण गर्नु भएकाले निकट भविष्यमा आफूले बंगलादेशको राजकीय भ्रमण गर्न लागेको जानकारी दिनु भएको थियो ।
