काठमाडौं । प्रधानमन्त्री केपी ओली अहिले पनि संसद विघटनकै पक्षमा देखिनुभएको छ । उहाँले मुलुकले ताजा जनादेश चाहेको भन्दै फेरि पनि संसद विघटन गर्ने चाहनाको संकेत दिनुभएको हो । उहाँले सो संकेत हिजो राष्ट्रपति विद्यादेवी भण्डारीले आयोजना गर्नुभएको सर्वदलीय बैठकमा पनि दिनुभएको छ ।
उता राष्ट्रपति विद्यादेवी भण्डारी स्वयं पनि ताजा जनादेशकै पक्षमा देखिनुभएको थियो । उहाँले पनि निर्वाचन त लोकतान्त्रिक पद्दति हो नि, सबैले स्वीकागर्नुपर्ने होइन र भनेर घुमाउरो पारामा निर्वाचनमा जान सकिने बताउनुभएको थियो ।
हिजोको सो बैठकमा कुनै दलहरु नबोलेका तर प्रधानमन्त्रीले भने संसद नै कामयबी नबनेकोले देशले फेरि पनि नयाँ निर्वाचन खोजेको बताउनुभएको थियो । राष्ट्रपति विद्यादेवी भण्डारीले संविधान कार्यान्वयन र लोकतन्त्रको सुदृढीकरणका लागि मुलुकले दलीय सहकार्य खोजेको भन्दै त्यसतर्फ केन्द्रित रहन सबै दलका नेतृत्वसँग आग्रह गर्नुभएको थियो ।
संसद् पुनःस्थापनापछिको राजनीतिक अवस्था र दलबीच बढिरहेको तिक्तताबीच राष्ट्रपति भण्डारीले मंगलबार शितल निवासमा सर्वदलीय बैठक आह्वान गर्नुभएको थियो ।
बैठकमा प्रधानमन्त्रीसमेत रहेका एमाले अध्यक्ष केपी शर्मा ओलीले भने मुलुकले ताजा जनादेश खोजेको भन्दै संसद् विघटनकै पक्षमा धारणा राखेका थिए । त्यसपछि कांग्रेस वरिष्ठ नेता पौडेलले भने चुनाव मात्रै विकल्प नभएको भन्दै प्रधानमन्त्रीलाई संसद् सुचारु गर्नेतर्फ लाग्न सुझाएका थिए ।
‘प्रधानमन्त्रीको जोड ताजा जनादेशमा जानुपर्छ भन्ने नै थियो, उहाँ फेरि पनि संसद् विघटनकै पक्षमा देखिनुहुन्थ्यो,’ बैठकबाट बाहिरिएपछि राष्ट्रिय जनमोर्चाका अध्यक्ष चित्रबहादुर केसीले सञ्चारकर्मीसँगको संवादमा भन्नुभएको थियो ।
हिजोको बैठकको प्रधानमन्त्रीको अभिव्यक्ति एवं केही दिनयताको संसद बैठकको अवस्था हेर्दा मुलुक फेरि पनि निर्वाचनमा नै जाने देखिएको छ । संसद बैठक बिजनेसमा प्रवेश गर्न सकेको छैन । प्रधानमन्त्रीले विघटन गरे पनि सर्वाेच्च अदालतले विघटन गरिदिएको संसद बैठक फाल्गुण २३ गतेबाट शुरु भएको छ तर बस्न सकेको छैन ।
यसकारण पनि प्रधानमन्त्री ओलीले संसद बैठक अवरुद्ध भएपछि यो संसदले निकास नदिने र ताजा जनादेशमा जानुपर्ने भन्दै सार्वजनिक अभिव्यक्ति दिँदै आउनभुएको छ ।
