काठमाडौँ । भारतीय क्रिकेट टीमका प्रभावशाली ब्याट्सम्यान विराट कोहलीले अफगानिस्तानविरुद्धको टी–२० शृंखलाअन्तर्गतको पहिलो खेल नखेल्ने भएका छन् ।
कोहलीले बिहीबार मोहालीमा हुनलागेको भारत र अफगानिस्तानबिचको पहिलो टी–२० खेल नखेल्ने भएका हुन् ।
व्यक्तिगत कारणले कोहली पहिलो टी–२० बाट बाहिरिएका भारतीय टोलीका प्रमुख प्रशिक्षक राहुल द्रबिडले जानकारी दिए । कोहलीले सिरीजका बाँकी दुई खेल भने खेल्नेछन् । दोस्रो खेल जनवरी १४ र तेस्रो खेल जनवरी १७ तारिखमा खेलिने छ ।
कोहली र रोहित शर्मा सन् २०२२ को टी–२० विश्वकपपछि पहिलो पटक भारतको टी–२० टोलीमा फर्किएका हुन् । केही पूर्वक्रिकेटरले रोहित शर्मा र विराट कोहलीलाई टी–२० टोलीमा फिर्ता बोलाउने निर्णयको आलोचना गरेका छन् । भारतीय टोलीका पूर्व खेलाडी दीप दासगुप्ताले रोहित र कोहली पुन: टी–२० टोलीमा फर्कँदा युवा खेलाडीहरू ओझेलमा पर्ने बताएका छन् ।
यसै वर्ष अमेरिका र वेस्ट इन्डिजमा आयोजना हुने टी–२० विश्वकपअघि भारतले अन्तिम टी–२० शृङ्खला खेल्न लागेको हो । यो शृंखलालगत्तै भारतीय टोलीले इङ्ल्यान्डसँग पाँच खेलको टेस्ट शृङ्खला खेल्ने कार्यक्रम रहेको छ ।
