काठमाडौँ । प्राधिकरणमा विभिन्न विषयमा विवादहरू उत्पन्न भइरहेका बेला नेपाल दूरसञ्चार प्राधिकरणका अध्यक्ष पुरुषोत्तम खनालले राजीनामा दिएका छन् ।
प्राधिकरणका अध्यक्ष खनालले मंगलबार आफ्नो पदबाट राजीनामा दिएका हुन् । उनले सञ्चारमन्त्री रेखा शर्मासमक्ष बुधबारदेखि लागू हुने गरी राजीनामापत्र बुझाएको मन्त्रालय स्रोतले बतायो ।
उनीमाथि प्राधिकरणले गर्ने विभिन्न खरिद तथा उपकरण जडानमा अनियमितता गरेको आरोपमा मन्त्रालय, अख्तियार र संसदीय समितिले छानबिन गरिरहेको छ । पछिल्लो समय टेरामक्स, एमडीएमएस, रेडियो नेपालको जग्गा खरिदबिक्री प्रक्रिया आदि विषयमा विभिन्न खालका विवादहरू बढ्दै गएपछि खनालले राजीनामा दिएको बुझिएको छ ।
तत्कालीन प्रधानमन्त्री केपी ओली सरकारले २०७६ साउनबाट खनाललाई प्राधिकरणको जिम्मेवारी दिएका थिए ।
