काठमाडौँ । सन् २०२३ मा १६ लाख भन्दा धेरै नेपालीले देश छाडेका छन् । अध्यागमन विभागले एक तथ्याङक जारी गर्दै वैदेशिक रोजगारीसहित विभिन्न प्रयोजनका लागि १२ महिनाको अवधिमा १६ लाख ३ हजार ८३६ जना बिदेसिएका जनाएको छ । जसमा ४ लाख ३२ हजार ५८४ जना महिला रहेका छन् भने ११ लाख ७१ हजार १८६ जना पुरुष रहेका छन् ।
विभागका अनुसार त्रिभुवन अन्तर्राष्ट्रिय विमानस्थल हुँदै वैदेशिक रोजगारीका लागि कुल ८ लाख ८ हजार ४१५ जना बाहिर गएका छन् ।पर्यटक भिसामा २ लाख ४ हजार ५१८ जना विदेशसिएका छन् भने पारिवारिक प्रयोजनका लागि १ लाख ६७ हजार ४८५ जना बाहिरीएका छन् ।
यस्तै, वैदेशिक अध्ययनका लागि एक वर्षको अवधिमा १ लाख ८ हजार ५४२ जना विदेशसिएका विभागले जनाएको छ । जसमा पुरुष ५९ हजार ९७८ र महिला ४८ हजार ५६२ जना रहेका छन् ।
अस्थायी आवासीय भ्रमणमा ९२ हजार ३४९ जना र स्थायी आवासीयमा कुल ७० हजार ९१५ जना बाहिरिएको विभागले तथ्याङ्कमा उल्लेख छ । कन्फ्रेन्स, सेमिनार र तालिममा २४ हजार २६३ जना, डिपेन्डेन्टमा २० हजार ६१३ जना र उपचारमा समेत १९ हजार जना भन्दा बढी बाहिरिएका छन् ।
त्यसैगरी, त्रिभुवन विमानस्थल हुँदै व्यापारका लागि १८ हजार ९६४, अफिसियल भिजिटका लागि १६ हजार १११, वैदेशिक रोजगारीकै लागि तर वर्क पर्मिट लिन नपर्नेहरू पनि ८ हजार ८६ जना बाहिरिएको विभागको तथ्याङ्कमा उल्लेख छ । युएन मिसनमा ६ हजार ५८, खेलकुद गतिविधिमा ३ हजार ६५३, कन्सर्ट तथा कार्यक्रममा ३ हजार ६५३ र अन्य ३२ हजार भन्दा धेरैले देश छोडेका छन् ।
