एजेन्सी । दक्षिण अफ्रिका भ्रमणका क्रममा चोट लागेपछि घुँडाको चोटबाट निको भइरहेका सूर्यकुमार यादवको बारेमा अर्को ठूलो खबर बाहिर आएको छ ।
आगामी आईपीएल सिजनअघि उनको अर्को शल्यक्रिया गर्नुपर्नेछ । यो खबरले उनको आईपीएल खेल्नेमा शंका उत्पन्न भएको छ । एक रिपोर्टले उनलाई स्पोर्ट्स हर्निया भएको खुलासा गरेको छ । यसका लागि उनको शल्यक्रिया गर्नुपर्नेछ र यसबाट निको हुन उनलाई ८–९ हप्ता लाग्न सक्छ ।
बीसीसीआई स्रोतले सूर्यकुमार यादव हर्नियाको शल्यक्रियाका लागि जर्मनी जाने जानकारी दिएको छ । टाइम्स अफ इन्डियाको रिपोर्ट अनुसार बीसीसीआईका एक अधिकारीले भने, ‘सुर्यालाई हालै स्पोर्ट्स हर्निया भएको पत्ता लागेको थियो । उनी हाल बैंगलोरस्थित राष्ट्रिय क्रिकेट एकेडेमी (एनसीए)मा छन् । दुई–तीन दिनमा उनी शल्यक्रियाका लागि जर्मनीको म्युनिख जानेछन् । यसको मतलब उनी यस सिजन रणजी ट्रफीमा मुम्बईका लागि पक्कै पनि खेल्ने छैनन् र आईपीएलमा मुम्बई इन्डियन्सका लागि उद्घाटन खेलहरू पनि खेल्न सक्ने छैनन् ।’
बीसीसीआई अधिकारीले थप भने, ‘जुनमा हुने टी–२० विश्वकपलाई ध्यानमा राख्दै सूर्यालाई पूर्णरुपमा निको हुनको लागि पूर्ण समय दिइनेछ । उनले टी–२० विश्वकपमा भारतको जितको सम्भावनालाई अझ बढाउनेछन् ।’
आईसीसीले यस प्रतियोगिताको तालिका सार्वजनिक गरेको छ । अमेरिका र वेस्ट इन्डिजले जुन १ देखि २९ सम्म आइसीसी प्रतियोगिता आयोजना गर्नेछन् । जुन ९ मा भारतले यस प्रतियोगितामा पाकिस्तानको सामना गर्नेछ ।
स्पोर्ट्स हर्निया भनेको कम्मरको क्षेत्र वा पेटको तलको मांसपेशी र लिगामेन्टहरू च्यातिनु वा तन्किनु हो । खेलकुद खेल्नेलाई मात्रै स्पोर्ट्स हर्निया हुन्छ भन्ने जरुरी छैन, तर खेल खेल्ने मानिसहरूमा यो बढी देखिन्छ । स्पोर्ट्स हर्निया प्रायः फुटबल, कुस्ती र आइस हक्की जस्ता खेल खेल्नेहरूमा हुन्छ ।
