एजेन्सी । प्रसिद्ध निर्देशक क्रिस्टोफर नोलनको फिल्म ‘ओपेनहाइमर’ ले ८१ औं गोल्डेन ग्लोब्समा उत्कृष्ट चलचित्रसहित ५ अवार्ड जितेको छ । यस्तै, मार्गोट रोबी स्टारर फिल्म ‘बार्बी’ले सिनेमेटिक र बक्स अफिस अचिभमेन्ट अवार्ड जितेको छ ।
समारोहमा अभिनेता सिलियन मर्फीले फिल्म ‘ओपेनहाइमर’का लागि उत्कृष्ट अभिनेता (नाटक) विधामा अवार्ड जिते । चलचित्र ‘किलर्स अफ द फ्लावर मुन’बाट अभिनेत्री लिली ग्लाडस्टोनलाई उत्कृष्ट अभिनेत्री (नाटक) अवार्ड दिइयो ।
गोल्डेन ग्लोब्स २०२४मा, बार्बीले ९ विधामा र ओपेनहाइमरले ८ विधामा सबैभन्दा बढी नोमिनेशन प्राप्त गरे । ‘द होल्डओभर्स’ र ‘पुअर थिंग्स’ जस्ता फिल्मले पनि समारोहमा धेरै प्रशंसा पाएका थिए ।
अवार्ड समारोह अमेरिकाको क्यालिफोर्नियाको लस एन्जलसस्थित बेभर्ली हिल्टन होटलमा आयोजना गरिएको थियो । कार्यक्रममा निकोलस केज, मार्गोट रोबी, लियोनार्डो डिक्याप्रियो, मेरिल स्ट्रिप, फ्लोरेन्स पग, एन्जेला बासेट, टेलर स्विफ्ट, दुआ लिपा लगायत धेरै ठूला सेलेब्स सहभागी थिए ।
