काठमाडौँ । सांसदहरुले दिएका सुझाव आगामी १६ औं पञ्चवर्षीय योजनामा समेट्न अर्थ समितिले राष्ट्रिय योजना आयोगलाई निर्देशन दिएको छ ।
आईतवार प्रतिनिधि सभा अन्तर्गतको अर्थ समिति बैठकपश्चात समिति सभापति सन्तोष चालिसेले योजना आयोगलाई यस्तो निर्देशन दिनुभएको हो । उहाँले राष्ट्रिय योजना आयोगले बनाउने हरेक योजना स्रोत सुनिश्चिताका आधारमा बनाउन आवश्यक रहेको बताउनु भयो । उहाँले स्रोत सुनिश्चिता भएमात्रै योजना बनाउनुपर्ने उल्लेख गर्नुभयो । उहाँले मुलुक खाद्यान्नमा आत्मनिर्भर बनाउने भनि रहँदा ५ अर्बको चामल खरिद भइरहेको बताउनु भयो । उहाँले मुलुक खाद्यान्नमा आत्मनिर्भर बनाउनको लागि उत्पादनलाई प्रोत्साहन गर्न आवश्यक रहेको भन्दै यस्तो विषयलाई १६ औं योजनामा समावेश गर्नुपर्ने बताउनु भयो ।
उहाँले भन्नुभयो,‘राष्ट्रिय योजना आयोगले सांसदहरुले दिएका सुझावलाई आगामी १६ औं पञ्चवर्षीय योजनामा समेट्नको लागि निर्देशन गदर्छु । आयोजले योजना बनाउँदा पैसाको कुरा आउँछ । पैसा भएमात्रै योजना बनाउने हो पैसा नभए के योजना बनाउने हो । आज ५ अर्बको चामल किनेर खाइरहँदा मुलुक खाद्यन्नमा आत्मनिर्भर नभएसम्म मुलुकमा भइरहेका उत्पादनलाई प्रोत्साहन दिएर निर्यात नबढाएसम्म आर्थिक विकास हुने भएकाले यस्तो विषयलाई १६ औं योजनामा समावेश गर्न आवश्यक छ । असाध्यै राम्रा कुराहरुमा सांसदहरुबाट सझावहरु आएका छन् । ती सुझावलाई समावेश गरेर आगामी योजना तर्जुमा होस् । यसमा हामी सबै जिम्मेवार छौं ।’
उहाँले समितिमा सांसदहरुले दिएका सुझावलाई समावेश गरेर आगामी १६ औं योजना तर्जुमा गर्न निर्देशन दिनुभयो ।
