एजेन्सी । एबी डिभिलियर्स भारत र दक्षिण अफ्रिकाबीच मात्र दुई टेस्टको शृंखला भएकोमा दुखी छन् । उनी अफ्रिकाको न्युजिल्यान्ड भ्रमणमा दुई टेस्ट मात्र खेल्नुलाई पनि उचित ठान्दैनन् ।
पूर्व अफ्रिकी ब्याट्सम्यान टी–२० का कारण टेष्ट क्रिकेटमा दबाब रहेको बताउँछन् । ‘टी–२० का कारण टेष्ट क्रिकेट खतरामा परेको छ । यस्तो अवस्थामा टेष्ट क्रिकेटलाई बचाउनको लागि परिवर्तन आवश्यक छ ।’ उनी भन्छन् ।
डिभिलियर्सले आफ्नो युट्युब च्यानलमा भारत र अफ्रिकाबीचको तेस्रो टेस्ट नहुनेमा आफू खुसी नभएको बताए । ‘यसका लागि विश्वभर चलिरहेको टी–२० क्रिकेटलाई दोष दिनैपर्छ । तर, मलाई थाहा छैन यो अवस्थाको जिम्मेवार को हो । तर म पक्कै बुझ्छु कि केहि गलत छ ।’ उनले भने ।
उनले अगाडि भने – ‘अहिले टेस्ट क्रिकेटमा मात्र नभई एकदिवसीय क्रिकेटमा पनि दबाब छ । सम्पूर्ण प्रणाली टी–२० क्रिकेट वरिपरि घुम्छ । खेलाडी, बोर्ड र प्रशिक्षक सबै पैसा भएको ठाउँमा सर्नेछन् । यदि तपाइँ टेस्ट क्रिकेटमा प्रतिस्पर्धा हेर्न चाहनुहुन्छ भने, दुई टेस्ट सिरिजको नियम परिवर्तन गर्नुपर्नेछ । दुई टोलीबीचको शृङ्खलामा २ भन्दा बढी टेस्ट हुनुपर्छ ।’
डिभिलियर्सले केप टाउनमा भारत र दक्षिण अफ्रिकाबीचको दोस्रो खेलको पिच राम्रो भएको बताए ।
दक्षिण अफ्रिकाले फेब्रुअरीको पहिलो साता न्युजिल्याण्ड भ्रमण गर्ने छ । पहिलो टेस्ट फेब्रुअरी ४ बाट सुरु हुनेछ भने दोस्रो टेस्ट फेब्रुअरी १३ बाट सुरु हुनेछ । यस भ्रमणका लागि दक्षिण अफ्रिकाले आफ्नो बी टोली पठाएको छ । यो भ्रमणमा कप्तानसहित सात खेलाडी अनक्याप छन् ।
नील ब्रान्डलाई भ्रमणको लागि कप्तान बनाइएको छ । टोलीका मुख्य खेलाडीले दक्षिण अफ्रिका टी–२० लिग खेल्ने भएकाले अनक्याप्ड खेलाडी छनोट गरिएको हो ।
