काठमाडौँ । नेकपा (एकीकृत समाजवादी) ले सचिवालय बैठक बोलाएको छ । गठबन्धन दलहरूको बैठक सकिए लगत्तै पार्टी मुख्यालय आलोकनगरमा बैठक बस्ने गरी बोलाईएको एकीकृत समाजवादीका उपमहासचिव जगन्नाथ खतिवडाले जानकारी दिए।
शनिबार बसेको बैठकले राष्ट्रिय सभाको उम्मेदवारको टुंगो लगाउने जिम्मा अध्यक्ष माधवकुमार नेपाल, उपाध्यक्ष राजेन्द्र पाण्डे र महासचिव घनश्याम भूसालललाई दिएको थियो ।
राष्ट्रिय सभाको रिक्त १९ स्थानमध्ये नेपाली कांग्रेसले १०, माओवादी केन्द्रले ६, एकीकृत समाजवादीले २ र जनता समाजवादी पार्टी (जसपा)ले १ सिट लिने गरी भागबन्डा भएको छ । यद्यपि त्यसमा एकीकृत समाजवादीले भने असन्तुष्टी व्यक्त गरेको छ ।
बालुवाटार बैठकमा कुरा नमिलेपछि थप निर्णय लिन एकीकृत समाजवादीले आकस्मिकरूपमा सचिवालयको बैठक बोलाएको हो ।
