सप्तरीः हिल्टी फाउन्डेसन र ह्याबिटाट फर ह्युमानिटीको सहयोग, सप्तरीका स्थानीय निकायको पहल तथा महुली सामुदायिक विकास केन्द्रले सप्तरीको शम्भुनाथ नगरपालिकाका मुशहर समुदायका लागि १४ वटा घर निर्माण गरी हस्तान्तरण गरेको छ ।
बाँसले बनाइएका यी प्रत्येक घरले ३८ वर्ग मिटर क्षेत्र ओगटेका छन् । सरकारी जमिनमा बनाइएका यी घरहरु १६९ वर्ग मिटर जमिनमा बनेका छन् ।
ह्याबिटाट फर ह्युमानिटी र महुली सामुदायिक विकास केन्द्रको पहलमा भएको घर निर्माणका लागि मुशहर समुदायले जनश्रमदान गरेका थिए ।
हिल्टी फाउन्डेसनको सिमेन्ट फ्रेम बेम्बो टेक्नोलोजी प्रयोग गरेर उक्त घरहरु निर्माण गरिएको हो । फाउन्डेसनका अनुसार यी घरहरु भूकम्प, बाढी र रोगकिरा जस्ता प्राकृतिक विपदहरुबाट जोगाउन मद्दत गर्नेछ ।
मार्च महिनाको शुरुमा प्रधानमन्त्री केपी शर्मा ओलीले हिल्टी–ह्याबिटाट साझेदारी अन्तर्गत अन्य परियोजनाको पनि भ्रमण गर्नु भएको थियो । बिर्तामोडमा पनि ३७ वटा घरहरु बनाइएका थिए ।
ह्याबिटाट फर ह्युमानिटी नेपालकी राष्ट्रिय निर्देशक क्रिस्टी स्टिक्नीले दुई दशकदेखि ह्याबिटाटले स्थानीय समुदाय, गैसस र सरकारी निकायहरुसँग मिलेर स्थानीय समुदायको उत्थानका लागि कार्य गरिरहेको बताउनुभयो ।
हिल्टी फाउन्डेनस र ह्याबिटाट फर ह्युमानिटी इन्टरनेसनलबीच सन् २०१२ देखि साझेदार रहेका छन् । आजसम्म यस साझेदारले विश्वभर ४५ लाख मानिसलाई सेवा गरिसकेको छ भने ९ लाखभन्दा बढी मानिसको जीवन सुधार गरेको छ ।
