काठमाडौँ । उपत्यकाका सबै १८ वटा नगरपालिकाका प्रमुखहरुले सडक बत्ती बापतको नेपाल विद्युत् प्राधिकरणले पठाएको विद्युत महसुल तिर्न नसक्ने जनाएका छन् ।
बुधबार गोकर्णेश्वर नगरपालकामा बसेको मेयर्स फोरमको बैठकमा उनीहरुले आफू निर्वाचित हुनुभन्दा अघिको समेत जोडेर प्राधिकरणले महसुल बिल पठाएको भन्दै निर्वाचित भएर आएदेखिको महसुल मात्र तिर्न सकिने जनाएका हुन् ।
गोकर्णेश्वर नगरपालिकाका प्रमुख दीपक रिसालले न्युजपोलारसंग भन्नुभयो, गोकर्णेश्वर नगरपालिकालाई साढे तीन करोडको बिल आएको छ । त्यस्तै काठमाडौँ महानगरपालिकाको रु दुई अर्ब र ललितपुर महानगरपालिकाको पनि रु एक अर्ब बक्यौता सहितको बिल आएको छ । त्यो सबै तिर्न सक्दैनौं ।
उहाँले अगाडि भन्नुभयो, “हामी आएर यो बक्यौता रहेको होइन, पहिलादेखिकै हो, यसको हिसाब कसरी राखेको हो थाहा छैन । प्राधिकरणले महसुल तिर्न भनेर बिल पठाएको छ, यो बक्यौता हो होइन थाहा छैन । सडकमा बलेको बत्ती हो त्यो । नगरपालिकाले नै तिर्नुपर्छ भनेको हो भने यो हामी आउनुभन्दा अघिदेखिकै हो । हामीलाई ठूलो भार पर्यो ।
उपत्यकामा रहेका सबै नगरपालिकाबीच आफूहरु निर्वाचित भएर आएदेखिको बिल तिर्ने तर पहिलादेखिको हो भने तिर्न नसक्ने सहमति भएको उहाँले जानकारी दिनुभयो । यस विषयमा ऊर्जा मन्त्रालय र प्राधिकरणका प्रमुख कार्यकारी कुलमान घिसिङसँग बसेर छलफल गरिने उहाँको भनाइ थियो ।
पछिल्लो समय नेपाल विद्युत प्राधिकरणले देशभरिकै नगर तथा गाउँपालिकाबाट महसुल उठाउन अभियान थालेको छ । तर स्थानीय निकायहरुले प्राधिकरणले नगर, गाउँमा गाडेका विद्युतका खम्बाका विषयमा केही नबोलेकोमा आक्रोश व्यक्त गर्दै आएका छन् । उनीहरुको भनाईमा खम्बाको भाडा प्राधिकरणले पनि स्थानीय निकायलाई तिर्नु पर्दछ, यस्तो बक्यौताको विषय पनि टुंगिएको छैन ।
प्राधिकरणले हालै उद्योगी व्यवसायीको पुरानो विद्युत महसुल उठाउन लाइन काट्दै आएको छ । तर यसको पनि चौतर्फी विरोध भइरहेको छ ।
