पोखरा । जिल्ला अदालत कास्कीले पोखराको सूर्यदर्शन बचत तथा ऋण सहकारी संस्थामा सर्वसाधारणले राखेको बचत अपचलनमा थप दुई जनालाई पुर्पक्षका लागि थुनामा पठाएको छ ।
अदालतले सहकारीका सञ्चालक भविश्वर अर्याल र पूर्वसञ्चालक शिवबहादुर गुरूङ ‘महेन्द्र भोटे’लाई बुधबार पुर्पक्षका लागि थुनामा पठाएको हो । सहकारीका अध्यक्ष गितेन्द्रबाबु राई (जिबी)सहित १९ जनाविरूद्ध भदौ २५ गते पक्राउ पुर्जी जारी भएपछि जिबी राईसहित अर्याल र गुरूङ समेत फरार थिए ।
उनीहरूले मंगलबार जिल्ला अदालत कास्कीमा उपस्थित भएपछि जिल्ला न्यायाधीश बसन्तजंग थापाको इजलासमा थुनछेक बहस भएको थियो । थुनछेक बहसपछि न्यायाधीश थापाको इजलासले अर्याल र गुरूङलाई पुर्पक्षका लागि थुनामा पठाएको हो ।
सहकारीको रकम अपचलन मुद्दा लागेका अध्यक्ष जिबी राईसहित १५ जना अझै फरार छन् । पोखरा महानगरले गरेको छानबिनका अनुसार उनीहरूले सूर्यदर्शन सहकारीबाट १ अर्ब ३५ करोड रुपैयाँ अपचलन गरेको पाइएको छ ।
ग्यालेक्सी टिभीका अध्यक्षसमेत रहेका सहकारीका पूर्वअध्यक्ष जिबी राईले पोखराको सूर्यदर्शन सहकारीबाट मात्रै कम्तीमा १० करोड रुपैयाँ गैरकानुनी रूपमा टेलिभिजनमा लगानी गरेको छानबिन प्रतिवेदनमा जनाइएको छ ।
