काठमाडौँ । गण्डकी प्रदेश सामाजिक विकास तथा स्वास्थ्यमन्त्री सुशिला सिम्खडाको एउटा तस्बिरले यतिबेला सामाजिक सञ्जाल निकै तताइरहेको छ । तस्बिरमा मन्त्री सिम्खडा मञ्चमा उभिएर भाषण गरिरहेको, मञ्च अगाडिको मैदान पुरै खाली रहेको र एक पुरुषले उनको तस्बिर खिचिरहेको देखिन्छ ।
यो तस्बिर पोखरा रंगशालामा शुक्रबार सुरु भएको जिल्लास्तरीय राष्ट्रपति रनिङ शिल्ड प्रतियोगिताको उद्घाटन समारोहको रहेको छ । कास्की जिल्ला खेलकुद विकास समितिले आयोजना गरेको प्रतियोगितामा मन्त्री सिम्खडा प्रमुख अतिथिका रुपमा कार्यक्रममा गएकी थिइन् ।
उद्घाटन समारोहअघि मार्चपास गरिएको थियो । मार्चपासमा प्रतियोगितामा भाग लिने खेलाडी, विद्यार्थी, प्रशिक्षक लगायत धेरैको बाक्लो उपस्थिती थियो । औपचारिक उद्घाटन कार्यक्रम निर्धारित समयभन्दा ढिलो हुँदा कतिपय प्रतियोगिता कभर्ड हलमा सञ्चालन भइरहेको थियो ।
उद्घाटन समारोह लम्बिन थालेपछि सहभागीहरु भने एकएक गर्दै बाहिरिन थाले । मन्त्री सिम्खडाको बोल्ने पालो आएपछि मैदानमा केही संख्यामा सञ्चारकर्मीबाहेक अन्य उपस्थित रहेनन् ।
मन्तव्य दिइरहँदा उनका श्रीमान जनक बिसी तस्बिर खिच्न मञ्च अगाडि पुगेका थिए । विष्ट मन्त्री सिम्खडाका स्वकीय सचिवसमेत हुन् । देखिएको सो दृश्यले अहिले चर्चा कमाइरहेको छ ।
